Шольц: Украинадаги уруш музлатилган можарога айланмаслиги керак

Эстонияда бўлиб турган Германия канцлери Олаф Шольц Таллиндаги матбуот анжуманида Украинадаги ҳарбий амалиётлар музлатиб қўйилиши ва уруш Россия ўз қўлида қоладиган тўқнашув можаросига айланиши мумкин эмаслигини айтди.

Шольц Германиянинг Kölner Stadt-Anzeiger газетасига жума куни чоп этилган интервюсида Кремл ҳақида худди шундай огоҳлантиришни билдирди.

"Россия тушуниши керакки, Россия ва Украина ўртасидаги чегарани ҳозирги фронт чизиғи бўйлаб чизиб, "совуқ тинчлик” тузиш ҳақида гап бўлиши мумкин эмас. Бу Путиннинг босқинчилик урушини қонунийлаштиради”, - дея огоҳлантирди Шольц.

“Гап адолатли тинчлик ҳақида бормоқда ва бундай тинчликнинг калити Россия қўшинларини олиб чиқиб кетишдир”, — деди Германия канслери 2014-йилда Россия томонидан аннекция қилинган Қрим ҳақида гапираётганига аниқлик киритмасдан.

Шунингдек, Шольц Россия президенти Владимир Путин билан алоқаларни узиш ниятида эмаслигини ва у билан яна телефон орқали гаплашишни режалаштираётганини айтди.

"Охирги телефон алоқамиздан бери маълум вақт ўтди. Ва мен Путин билан керакли вақтда яна гаплашмоқчиман", - деди Шольц.

Кремл немис томондан ҳозирча суҳбат бўйича ҳеч қандай таклиф олмаганини айтди.