Сенат ва ЕХҲТ ПА тизимли мулоқот ва фаол алоқаларни ривожлантириш бўйича келишиб олди
Сенат раисининг биринчи ўринбосари Содиқ Сафоев Европада хавфсизлик ва ҳамкорлик ташкилоти Парламент Ассамблеясининг (ЕХҲТ ПА) Марказий Осиё ва Мўғулистон бўйича махсус вакили Фара Каримий бошчилигидаги делегация билан учрашув ўтказди, деб хабар қилмоқда "Дунё" АА мухбири.
Парламент юқори палатаси ахборот хизмати маълумотига кўра, учрашувда ҳозирги вақтда парламент дипломатиясининг роли сезиларли даражада ошгани қайд этилди. Томонларнинг фикрича, айнан икки томонлама ва кўп томонлама парламент мулоқоти халқаро майдонда ўзаро англашув ва ишончни мустаҳкамлашга, жаҳон ҳамжамиятининг саъй-ҳаракатларини минтақавий ва глобал муаммоларни ҳал этишга қаратишга кўмаклаша олади.
Сўнгги йилларда Ўзбекистонда кенг кўламли сиёсий ва иқтисодий ислоҳотлар амалга оширилаётгани, янгиланган ташқи сиёсат олиб борилаётгани туфайли мамлакатимизнинг ЕХҲТ ва унинг институтлари билан ўзаро ҳамкорлиги сифат жиҳатидан янги босқичга кўтарилгани алоҳида таъкидланди.
Томонлар атроф муҳитни муҳофаза қилиш, экология ва сув ресурсларидан оқилона фойдаланиш соҳасидаги ҳамкорлик ҳолати ва истиқболлари юзасидан фикр алмашди.
Марказий Осиё экологияси ва сув ресурслари бир-бирига чамбарчас боғлангани сабабли бу борадаги долзарб масалаларни ҳал этишда минтақавий ёндашув муҳимлиги таъкидланди. Шу нуқтаи назардан ЕХҲТ ПА вакиллари "Марказий Осиёда Барқарор ривожланиш мақсадларини амалга ошириш" юзасидан Ассамблеянинг махсус резолюциясини қабул қилиш бўйича Ўзбекистон ва Қозоғистон делегацияларининг қўшма ташаббуси муҳимлигини қайд этди. Ушбу резолюцияда минтақадаги долзарб муаммоларни ҳал этишга доир таъсирчан чора-тадбирларни амалга ошириш учун халқаро ташкилотлар салоҳиятини жалб қилиш бўйича аниқ тавсиялар келтирилган.
Суҳбат чоғида ЕХҲТ ПА делегацияси аъзолари Ўзбекистонда Тараққиёт стратегиясини амалга оширишнинг бориши, барча даражадаги вакиллик ҳокимияти органларининг ролини ошириш, шунингдек, атроф муҳит ва сув ресурсларидан оқилона фойдаланиш соҳасидаги муаммоларни ҳал этиш бўйича Ўзбекистон томонининг фикри билан атрофлича танишди.
Учрашувда томонлар ЕХҲТ ПА доирасида тизимли мулоқот ва фаол алоқаларни ривожлантиришга келишиб олди.
