Сенат: 3 йилда 2 минг 72 нафар шахс ота-оналик ҳуқуқидан маҳрум қилинган
Кейинги йилларда болаларга нисбатан содир этилаётган зўравонликлар сони ортиб бормоқда. Мавжуд ҳуқуқий механизмлар унинг олдини олиш ҳамда жабрланувчилар ҳуқуқлари ва қонуний манфаатларини ҳимоя қилишда етарли самара бермаяпти.
Охирги 3 йилда 2 минг 72 нафар шахс судлар томонидан ота-оналик ҳуқуқидан маҳрум қилинган. Шундан 1 минг 777 нафари, яъни 86 фоизи ота-оналик мажбуриятларини бажаришдан бош тортганлиги учун жавобгарликка тортилган.
Сенатнинг Ёшлар, маданият ва спорт масалалари қўмитаси мажлисида шу ҳақда гап борди.
Мажлисда «Болаларни зўравонликнинг барча шаклларидан ҳимоя қилиш тўғрисида»ги қонун кўриб чиқилди.
Муҳокама жараёнида сенаторлар томонидан ушбу қонун юқоридаги каби салбий ҳолатларга барҳам беришига ишонч билдирилди. Чунки қонунда болаларни зўравонликнинг барча шаклларидан ҳимоя қилиш соҳасидаги муносабатларни тартибга солиш назарда тутилган.
Хусусан, зўравонликдан жабрланувчи ариза билан тегишли ваколатли органларга ёки судга мурожаат этиши, махсус марказларда, шунингдек, бепул телефон линияси орқали бепул ҳуқуқий, иқтисодий, ижтимоий, психологик, тиббий ва бошқа ёрдам олиши, ҳимоя ордери бериш тўғрисидаги талаб билан мурожаат қилиши мумкинлиги акс эттирилмоқда. Шунингдек, етказилган моддий зарарнинг ўрни қопланиши ҳамда маънавий зиён компенсация қилинишини талаб қилиш ҳам белгиланмоқда.
Қонунда болаларни зўравонликдан ҳимоя қилиш соҳасидаги давлат сиёсатининг асосий йўналишлари, мазкур йўналишда фаолият юритаётган давлат органлари ва ташкилотлар ҳамда уларнинг ваколатлари аниқ белгилаб берилмоқда.
Ижтимоий ҳимоя миллий агентлигига зўравонликдан жабрланувчи, шунингдек, ўзларига нисбатан зўравонлик содир этиш хавфи остида бўлган болаларни аниқлаш, уларнинг ҳисобини юритиш ҳамда зарур ҳолларда уларга нисбатан зўравонликнинг олдини олишга доир якка тартибдаги чора-тадбирлар қўлланилишини таъминлаш бўйича вазифалар юклатилмоқда.
Қонун билан ота-оналар масъулияти яна бир карра оширилади. Жумладан, ота-оналар болаларнинг ҳаёти ва соғлиғини муҳофаза қилиши, уларга ғамхўрлик кўрсатиши ҳамда зарарли таъсир кўрсатувчи ахборотдан ҳимоя қилиши шартлиги, болаларни тарбиялашда уларни жисмоний жазолаш тақиқланиши назарда тутилмоқда.
Муҳокама жараёнида ушбу қонуннинг қабул қилиниши болаларга нисбатан зўравонлик ҳолатларига муросасиз муносабатда бўлиш ва зўравонлик содир этган шахсларга нисбатан жавобгарликнинг муқаррарлиги таъминланишига хизмат қилиши таъкидланди.
Сенаторлар, вазирлик ва идоралар масъуллари, экспертлар, шунингдек, ҳудудлардан маҳаллий кенгашларнинг тегишли доимий комиссияси аъзолари иштирок этган мажлис якунида қўмитанинг тегишли қарори қабул қилинди.
