Пригожиннинг васиятномаси эълон қилинди
“ВЧК-ОГПУ” Телеграм-каналида “Вагнер” хусусий ҳарбий ширкат асосчиси Евгений Пригожиннинг васиятномаси чоп этилди. 2023-йил 2-мартдаги ҳужжатга кўра, тадбиркор барча мол-мулкини 25 ёшли ўғли Павелга васият қилган.
“Ўлим вақтида менга тегишли бўлган барча мол-мулким, у нима бўлишидан ва қаерда жойлашганидан қатъи назар, шунингдек, келажакда менга тегишли бўлиши мумкин бўлган мол-мулкимни Павел Егениевич Пригожинга васият қиламан”, дейилади ҳужжатда.
Васиятнома шартларига кўра, Павел мерос ҳисобидан Пригожиннинг беваси, қизлари ва онаси Виолетта Пригожина учун "муносиб яшашни таъминлаши" керак. Онаси нафақахўр сифатида мероснинг 10 фоизини олиш ҳуқуқига эга.
“ВЧК-ОГПУ” Телеграм-канали муаллифларининг манбасига кўра, Пригожинлар оиласида марҳум Евгений Пригожиннинг мулкининг нотекис тақсимланиши фонида можаро бошланган. Пригожин бева ва қизларига ҳеч нарса васият қилмаган.
ОАВ хабарларига кўра, Павел Пригожин Санкт-Петербургдаги турар жой ва унинг остидан ер участкасини олади. Унинг умумий кадастр қиймати 32,5 миллион рублни ташкил қилади.
Шунингдек, у “Вагнер” МЧЖни, “Аурум” МЧЖ кинокомпаниясидаги улушни, “Ритм” нотураржой мулкларини сотиш ва ижарага бериш компаниясини, кўчмас мулк бошқаруви ва савдо компанияси “Конкорд Менеджмент и Консалтинг” МЧЖ, “Конкорд Кейтеринг" компанияси ва бошқаларни олади.
