Пентагон Оқ уйнинг Украинага МQ-1C Grey Eagle ҳужумчи дронларини етказиб бериш режасини тўхтатди
Жо Байден маъмуриятининг Украинага тўртта йирик ҳужумчи дронларни сотиш режаси бу мураккаб кузатув ускуналари душман қўлига тушиши мумкинлигидан қўрқиб, тўхтатиб қўйилди, дея хабар бермоқда Reuters манбаларга таяниб.
Пентагоннинг Мудофаа технологиялари хавфсизлиги бошқармаси Оқ уй томонидан тасдиқланган режани рад этди, деди агентликнинг уч суҳбатдоши.
Украинага Hellfire ракеталари билан қуролланиши мумкин бўлган тўртта MQ-1C Grey Eagle дронларини сотиш режаси ҳақида июнь ойи бошида хабар берилган эди.
Дронларни экспорт қилиш бўйича эътирозлар радар ва кузатув ускуналари Россия қўлига тушиб қолса, Америка Қўшма Штатлари хавфсизлигига хавф туғдириши мумкинлиги ҳақидаги хавотирлар туфайли юзага келган.
Манбаларнинг таъкидлашича, бу мулоҳаза дастлабки муҳокамада эътибордан четда қолган, аммо ўтган ҳафта охирида Пентагонда бўлиб ўтган учрашувларда яна такрорланган.
