Ота ўз фарзандига буйрагини берди
Гулистон тиббиёт кластерининг Нефрология ва гемодиализ бўлимида буйрак етишмовчилиги касаллиги боис гемодиализ муолажасини олиб келаётган Ким Олегда буйрак билан боғлиқ, буйрак трансплантацияси амалиёти ўтказилди.
– Ўғлим йигирма икки ёшга кирди. – дейди Гулистон туманининг Бешбулоқ маҳалласида истиқомат қилаётган Рўзигул Зияддинова. – Орзулари бир олам эди. Аммо буйрак билан боғлиқ хасталик туфайли мана саккиз йилдан бери фарзандим Гулистон тиббиёт кластерининг Нефрология ва гемодиализ бўлимида даволаниб келади. Ўтган йиллар давомида нелар бўлмади дейсиз. Гоҳо фарзандимни кўтариб, гоҳо аравачада, қишни қиш, ёзни ёз демай гемодиализ муолажасига олиб келардик. Бу нафақат фарзандимга, унинг учун яратгандан шифо сўраган ота-она ва унинг жигарлари учун осон бўлмади.
Тиббиётимиздаги ислоҳотлар сабаб Олег Ким гемодиализ муолажасидан қутиладиган бўлди. Унга отаси Ким Аркадий бир буйрагини берди. Мазкур амалиёт Гулистон тиббиёт кластерида Академик В.Воҳидов номидаги Республика ихтисослаштирилган хирургия илмий-амалий тиббиёт марказининг Қон томир хирургия, буйрак трансплантация бўлими мудири, тиббиёт фанлари номзоди Акрам Аҳмедов, мазкур марказ врач-хирурги, тиббиёт фанлари номзоди Ойбек Тоиров ҳамда Гулистон тиббиёт кластери хирурги Шерзод Тошмаматов бошчилигидаги сирдарёлик тиббиёт ходимлари томонидан муваффақиятли бажарилди.
Барча харажатлар Давлат тиббий суғуртаси жамғармаси томонидан қоплаб берилди. Айни вақтда бемор ва унинг отаси Гулистон тиббиёт кластерида шифокорлар назорати остида даво муолажаларини олмоқда.
