Олмалиқда том қулаши оқибатида жабрланган ҳиндистонликларнинг аҳволи ҳақида маълумот берилди
Олмалиқ кон-металлургия комбинати Enter Engineering компаниясининг металл тайёрлаш цехида содир бўлган фалокатда жабрланганлар юзасидан маълумот берди.
20 февраль куни Enter Engineering компаниясининг металл тайёрлаш цехидаги вақтинчалик қурилманинг том қисми қулаши оқибатида юз берган бахтсиз ҳодиса туфайли жами 30 нафар ҳиндистонлик ишчи-ходимлар жабрланган эди. Уларнинг 3 нафари воқеа жойида вафот этган бўлиб, 27 нафарига зудлик билан тезкор тиббий ёрдам кўрсатиш ишлари ташкил этилган.
Қайд этилишича, тўрт нафар жабрланганларга Оҳангарон тумани шошилинч тиббий марказида чуқурлаштирилган тиббий кўрик ташкил этилиб, тез тиббий ёрдам кўрсатилди ва аҳволлари яхши бўлгани учун шифохонадан жавоб берилган. Жабрланганларнинг 23 нафарига эса Олмалиқ шаҳар шошилинч тиббиёт марказида тезкор тиббий ёрдам кўрсатиш ишлари ташкил этилган.
Ихтисослаштирилган шошилинч тиббий ёрдам илмий маркази шифокорлари ёрдамида беморларнинг 6 нафарида жарроҳлик операцияси муваффақиятли ўтказилган. Ҳозирда улар Республика ихтисослаштирилган шошилинч тиббий ёрдам илмий марказида муолажаларни давом эттирмоқда, аҳволлари қониқарли.
Шунингдек, қолган 17 нафар жабрланувчига Олмалиқ шаҳар шошилинч тиббий марказда тиббий ёрдам кўрсатиляпти, аҳволлари ўрта ва енгил ҳолатда. Жабрланганларнинг барчасига алоҳида шифокор бириктирилган, сифатли тиббий ёрдам кўрсатилмоқда.
“Ҳиндистонлик жабрланган ишчи-ходимлар учун тезкор тиббий ёрдам ташкил этиш ишларига Соғлиқни сақлаш вазирлиги, Республика илмий марказ раҳбарлари жалб этилган. Олмалиқ кон-металлургия комбинати масъуллари ҳам жабрланганлар ҳолидан мунтазам хабар олиб турибди”, — дейилади хабарда.
