Олий суд ва СамДУ ўртасидаги амалий ҳамкорлик ютуқлари эътироф этилди

Олий суд ва СамДУ ўртасидаги амалий ҳамкорлик ютуқлари эътироф этилди

Олий суднинг Кадрлар бошқармаси бошлиғи М. Мухитдинов Самарқанд давлат университетининг “Ҳуқуқшунослик факультети” талабалари билан мулоқот қилди.

Учрашув Олий суд ва Самарқанд давлат университети ўртасида имзоланган юридик кадрларни тайёрлаш соҳасидаги ўзаро ҳамкорлик тўғрисидаги меморандум ижросини таъминлаш мақсадида ташкил этилди.

Суд-ҳуқуқ тизимида амалга оширилаётган кенг қамровли ислоҳотлар тарғиботига алоҳида эътибор қаратилган мазкур учрашувда нафақат истиқболли режалар, балки Олий суд ва СамДУ ўртасидаги амалий ҳамкорлик натижасида эришилган ютуқлар ҳам алоҳида эътироф этилди.

Таъкидланганидек, Олий суд қисқа давр мобайнида республикамизнинг 6 та йирик олий таълим муассасаси билан манфаатли ҳамкорликни йўлга қўйган бўлиб, улар орасида Самарқанд давлат университети алоҳида ўрин тутади.

Мамлакатимизнинг энг йирик ҳудудларидан бири ҳисобланган Самарқанд вилоятидаги суд ҳокимияти органларида ҳам олий маълумотли юридик кадрларга бўлган эҳтиёж жуда юқори.

Шу боисдан ҳам 2024 йилдан эътиборан мазкур олийгоҳ талабаларига суд органларида узлуксиз амалиёт ўтаб, ўз касбий кўникмаларини мунтазам равишда ошириб боришлари учун имконият яратилди. Жорий йилнинг май ойи ҳолатига юридик факультетнинг 200 нафарга яқин талабаси бу имкониятдан фойдаланишга муваффақ бўлди. Улар орасида ҳозирдан бошлаб судда ишлаш истагида бўлган ва келажакда ўзини шу соҳанинг етук мутахассиси сифатида кўраётган ёшлар борлиги ғоятда қувонарлидир.

Эътиборлиси шундаки, Олий суд раҳбарияти томонидан айни кездаёқ суд тизимида ишлаш истагини билдирган интилувчан ва изланувчан талабаларга қонунчиликка кўра меҳнат қилиш, иш ўрганиш ва тажриба орттириш учун барча имкониятлар яратиб берилиши таъминланади.

Учрашувда иштирок этган талабалар суд тизимидаги бўш иш ўринлари, ходимлар учун яратилган шароитлар, ижтимоий кафолатлар, ишга қабул қилиш тартиби ҳамда номзодларга қўйиладиган талаблар ҳақида атрофлича маълумотга эга бўлдилар.


Матнда хатолик топсангиз, ўша хатони белгилаб, бизга жўнатинг (Ctrl + Enter).

Бўлимга тегишли қизиқарли хабарлар

Фикр билдириш учун қайдномадан ўтишингиз сўралади ва телефон ракамни тасдиклаш керак булади!