NYT: АҚШ Россияга қарши бир қатор киберҳужумлар тайёрламоқда
Қўшма Штатлар 2020 йил охирида АҚШ ҳукумат муассасаларига уюштирилган кенг кўламли хакерлик ҳужумига жавобан Россияга қарши кейинг уч ҳафта ичида бир нечта киберҳужумларни бошлайди. Бу ҳақда ҳужум режасидан хабардор расмийларга таяниб, The New York Times (NYT) хабар берди.
Киберҳужумлар иқтисодий санкциялар билан биргаликда амалга оширилади. NYT суҳбатдошларининг фикрига кўра, бу Оқ уй илгари бир неча бор таъкидлагандек, Президент Жо Байден маъмуриятининг федерал тармоқлар бузилишига қарши жавоби бўлади. Газетанинг ёзишича, хакерлик ҳужумлари бутун дунё учун махфий ва кўринмас, аммо «Россия разведкаси, Қуролли кучлари ва президент Владимир Путин учун очиқ-ойдин бўлади».
Бундан ташқари, Вашингтон Хитойга қарши қасос киберҳужумлари уюштириш масаласини кўриб чиқмоқда. 2 март куни Microsoft компанияси Hafnium деб номланган хитойлик хакерлар гуруҳи ҳужуми ҳақида хабар берган. Хакерларнинг мақсади юқумли касалликлар тадқиқотчилари, юридик фирмалар, университетлар, нодавлат ташкилотлар, таҳлил марказлари ва бошқа бир қатор ташкилотлардан маълумот олиш бўлган. Microsoft ушбу гуруҳни Хитой ҳукумати қўллаб-қувватлайди деб ҳисобламоқда.
Эслатиб ўтамиз, 2020 йил охирида кибержиноятчилар SolarWinds IТ платформасидан фойдаланиб, Американинг бир қатор идоралари, шу жумладан, Молия вазирлиги ва АҚШ Савдо вазирлигининг Миллий телекоммуникация ва ахборот маъмурияти тизимларини бузиб кирган эди.
Америка Қўшма Штатлари мамлакат ҳукумат идораларига қилинган хакерлик ҳужумига россиялик хакерлар алоқадор деб даъво қилган. Президент Жо Байденнинг сўзларига кўра, киберҳужум пухта режалаштирилган ва натижада ҳужумчилар Америка бизнесига оид муҳим маълумотларни ўғирлашга муваффақ бўлган. Шунингдек, у воқеани шундай қолдирмаслигини қўшимча қилган. Reuters хабарига кўра, ҳужумга жавоб сифатида молиявий жазо ва жавоб киберҳужумлари эҳтимолий чора сифатида кўриб чиқилган.
Шунингдек, Microsoft раҳбари мазкур киберҳужумга Россиянинг алоқадорлиги бўйича далиллар борлигини маълум қилган. FireEye киберхавфсизлик компанияси раҳбари Кевин Мандиа эса ҳужумда хакерлар қўллаган воситалар Россия фойдаланадиган қурилмаларга ўхшашлигини таъкидлаган.
