Молдовада ҳукуматга қарши намойиш бўлмоқда

Молдова пойтахтидаги нарх ошишига қарши норозилик акциясида бир неча минг киши иштирок этмоқда, деб хабар берди “РИА Новости”.

“Шор” мухолифат партияси тафдорлари май ойидан бери Кишинёв ва бошқа қатор аҳоли пунктларида намойиш ўтказмоқда.

Пойтахтда “Янги ҳаёт” шиори остида ўтаётган акция иштирокчилари орасида ишчилар, ўқитувчилар, шифокорлар, пенсионерлар бор. Кўпчилик вилоятлардан келган.
“Одамлар газ ҳақини тўлай олмаяпти. Электр қиммат, ёқилғи нархи ошишидан ақлдан озиш мумкин”, - дейди “Шор” партияси раиси ўринбосари Марина Таубер.

Сиёсатчи, шунингдек, эрталаб полиция ташкилотчиларга ҳудудни акция учун тайёрлаш — саҳна ва махсус жиҳоз ўрнатишга тўсқинлик қилганини айтди.

Молдова баҳор охирида мисли кўрилмаган нарх ўсишига дуч келди. Миллий статистика бюроси май ойида инфляция ўртача 29,05 фоизни ташкил қилганини эълон қилди. Озиқ-овқат нархи 32,5 фоиз, бошқа маҳсулотлар 21,45 фоиз, аҳолига кўрсатилаётган хизмат 35,27 фоиз ошди. Мухолифат мамлакатдаги иқтисодий инқирозда ҳукумат ва ҳукмрон Ҳаракат ва бирдамлик партиясини айбламоқда.