Мажбурий ижро ҳаракатлари сабаб 10 млрд. сўмлик солиқ қарзи ундирилди

Солиқ тўловчилар томонидан солиқлар ва мажбурий тўловларни ўз муддатида ва тўлиқ ҳажмда тўламасликлари натижасида қарздорлик юзага келади.

Солиқ ва бошқа мажбурий тўлов қарздорликларининг ошиб кетиши давлат бюджетига ҳамда хўжалик юритувчи субъектлар молиявий фаолиятига салбий таъсир этади.
Мажбурий ижро бюроси органлари томонидан солиқ қарзи бўйича мажбуриятга эга шахснинг солиқ қарздорлигини ундириш умумий юрисдикция судлари ҳамда солиқ органи қарорларига асосан амалга оширилади ва бу борада самарали ишлар қилинмоқда.

Мисол учун, Бюронинг Ромитан туман бўлими иш юритувига Ўзбекистон Республикаси Давлат солиқ қўмитаси Йирик солиқ тўловчилар бўйича ҳудудлараро давлат солиқ инспексиясининг 25.05.2022 йилдаги “Солиқ мажбуриятига эга шахснинг мол-мулки ҳисобидан солиқ қарзини ундириш бўйича қарори”га асосан қарздор “ERIELL OSME DMCC” (ОАЭ) дан 10 млрд. 665 млн. 874 минг сўм солиқ қарзи ундириш тўғрисидаги ижро ҳужжати келиб тушди ва шу куннинг ўзида “Ижро иши юритишни қўзғатиш тўғрисида”ги қарор қабул қилиниб, томонларга юборилди.

Бўлим давлат ижрочилари томонидан олиб борилган мажбурий ижро ҳаракатлари давомида “ERIELL OSME DMCC”нинг ҳисоб рақамларидан инкассо топширикномаси орқали 10 млрд. 665 млн. 874 минг сўм миқдоридаги маблағ ундирилиб, бюджет ҳисоб рақамларига кўчириб берилди ва ижро ҳужжати иш юритувидан тамомланди.