Лукашенко: Беларус Ўзбекистонни Марказий Осиёдаги асосий ҳамкор деб билади
Беларус раҳбари Александр Лукашенко Беларус Ўзбекистонни Марказий Осиёдаги асосий ҳамкори деб билишини айтди.
Қайд этилишича, у бу ҳақда Ўзбекистон Президенти Шавкат Мирзиёев билан телефон орқали мулоқоти чоғида маълум қилган.
“Беларус Ўзбекистонга Марказий Осиё минтақасидаги асосий ҳамкор сифатида қарайди ва ЕОИИда уни ҳар томонлама қўллаб-қувватлашга, Евроосиё иқтисодий иттифоқи билан ҳамкорликда мамлакат иқтисодиётининг тўлиқ иштирокини таъминлашга тайёр”, — дейилади президент матбуот хизмати хабарида.
Таъкидланишича, гап Ўзбекистоннинг Беларуснинг Шанхай ҳамкорлик ташкилотига (ШҲТ) аъзо бўлиш ҳақидаги аризасини қўллаб-қувватлаши ҳақида ҳам борди.
Эслатиб ўтамиз, аввалроқ Россия президенти Владимир Путин ва Мирзиёев Ўзбекистонда бўлиб ўтадиган ШҲТ саммитига тайёргарлик масалаларини муҳокама қилгани хабар қилинганди.
