Канададаги ўрмон ёнғини AҚШнинг тўрт штатида ҳаво сифатини ёмонлаштирмоқда

Канадада давом этаётган ўрмон ёнғини туфайли туманли об-ҳаво Aмериканинг тўрт штатини ҳам қамраб олди. Бу ҳолат ҳаво сифатига кескин салбий таъсир кўрсатмоқда.

“NBC News” телеканали Канад Идоралараро ўрмон ёнғини маркази маълумотига таяниб хабар беришича, мамлакат бўйлаб 146 ёнғин содир бўлиб, ғарбда 11 300 гектар майдон ёниб кетган. Бу жорий мавсум йирик ўрмон ёнғини биринчи сериясидир. Британия Колумбияси ва Aльбертадаги ўнлаб офат ўчоғи “назоратдан ташқарида” дея таърифланмоқда.

Канададан чиқаётган тутунни шамол Монтана, Шимолий Дакота, Жанубий Дакота ва Миннесота штатларигача олиб боряпти. AҚШ атроф-муҳитни муҳофаза қилиш агентлиги индекси шуни кўрсатдики, ушбу ҳудудларда ҳаво сифати аҳоли учун “ўртача”дан “носоғлом”гача тушган.

Ўрмон ёнғини натижасида ҳаво кирланиши диққат билан назорат қилинади, чунки диаметри 2,5 микрометрдан кам майда тутун зарраси инсон иммунитетини заифлаштириши, астма, ўпка саратони ва бошқа сурункали нафас йўли касалликлари хавфини ошириши мумкин. Кексалар, чақалоқлар, болалар ва ҳомиладор аёллар ёмон ҳавога нисбатан энг заиф қатлам ҳисобланади.

Канада расмийлари фикрича, мамлакат тарихдаги энг ҳалокатли ўрмон ёнғини мавсумини бошдан кечирган ўтган йил 18,2 миллион гектар майдон ёниб кетган. Мамлакат яна ёнғин хавфи юқори мавсумга тайёрланмоқда. Ҳукумат май ойигача юқори хавфли ҳудудларда қурғоқчилик сақланиб қолиши, бу табиий ва техноген ёнғин хавфини оширишига урғу берган.