Жиззахлик аёл қўшнисига: "Машинангни бермасанг, қизингнинг шармандасини чиқараман"

Жиззахлик аёл қўшнисига: "Машинангни бермасанг, қизингнинг шармандасини чиқараман"

Жиззахда ўз қўшнисидан товламачилик йўли билан катта миқдорда пул ва автомобиль ундирмоқчи бўлган аёл қўлга олинди. Бу ҳақда Жиззах вилояти ички ишлар бошқармаси «Дарё»га маълум қилди.

14 октябрь куни Жиззах шаҳар Заргарлик маҳалласида истиқомат қилувчи 1974 йилда туғилган фуқоро А.Э. қўшниси 1988 йилда туғилган аёл С.Э.нинг товламачилик йўли билан пул талаб қилаётгани важи юзасидан Жиззах вилояти ички ишлар бошқармаси коррупция ва иқтисодий жиноятларга қарши курашиш бўлими ходимларига мурожаат қилади.

Маълум бўлишича, С.Э. қўшнисининг қизи 1997 йилда туғилган Н.А.нинг 20 октябрь куни фотиҳа тўйи бўлишидан хабар топади. Шундан сўнг у отасига «Агарда қизингнинг тўйи бўлишини, тўй тинч ўтишини, бўлажак қудаларингнинг олдида шарманда бўлишни истамасанг, менга 115 миллион сўмлик Gentra русумли автомашинангни берасан», деб қўрқитади.

Бундан ташқари, А.Э. бу талабларни бажаришдан бош тортса, қизининг енгилтабиат эканлигини айтиб, ижтимоий тармоқларга жар солишини маълум қилади.

Олиб борилган тезкор тадбир давомида Заргарлик маҳалласи ҳудудида фуқаро С.Э. қўшниси А.Э.дан 73 миллион 719 минг сўмлик Nexia-3 русумли автомашина ҳамда 1 минг 500 АҚШ долларни товламачилик йўли билан олаётган вақтда Жиззах вилояти ички ишлар бошқармаси коррупция ва иқтисодий жиноятларга қарши курашиш бўлими ходимлари қўлга олади.

Жиззах вилоят ИИБ ахборот мултимедиа гуруҳининг маълум қилишича, ҳолат юзасидан Жиззах шаҳар Ички ишлар органлари фаолиятини мувофиқлаштириш бошқармаси тергов бўлими томонидан Ўзбекистон Республикаси Жиноят кодексининг 165-моддаси (товламачилик) 3-қисми «а» банди билан жиноят иши қўзғатилган.


Матнда хатолик топсангиз, ўша хатони белгилаб, бизга жўнатинг (Ctrl + Enter).

Бўлимга тегишли қизиқарли хабарлар


Фикр билдириш учун қайдномадан ўтишингиз сўралади, ва телефон ракамни тасдиклаш керак булади!