Исроил БМТ агентлик ходимларини чиқариб юбориши мумкин

Бош котиб Антониу Гутерреш ЦАХАЛни можарода бўлган болаларни зўравонлик қилувчилар қора рўйхатига киритганидан кейин Исроил ҳукумати БМТ агентликларига қарши жавоб чораларини кўрмоқда.

Бу ҳақда Financial Times газетаси ёзмоқда.

«Беньямин Нетаньяху ҳукумати Исроил ва Фаластин ҳудудида фаолият юритаётган БМТ агентликларига қарши кенг қамровли чораларни, жумладан, ходимларни чиқариб юборишни ҳам муҳокама қилди», — дейилади нашрда.

Жавоб чоралари БМТнинг хорижий ходимлари учун виза муддатини узайтиришни секинлаштириш ёки бутунлай тўхтатишни ўз ичига олади. Бирлашган Миллатлар Ташкилотининг бутун миссияларини чиқариб юборишга рухсат берилади.