"Илойим болангнинг ўлигининг устида ўтир": Андижонда раҳбар аёл ходимларни ҳақоратлади (АУДИО)

"Илойим болангнинг ўлигининг устида ўтир": Андижонда раҳбар аёл ходимларни ҳақоратлади (АУДИО)

Хабарингиз бор, "Human.uz" сайти орқали жорий йилнинг 11 июнида "Илойим болангни ўлигини устида ўтир" — Андижон шаҳар халқ таълими мудири мактаб директорларини ҳақоратлади хабар эълон қилинган эди.

Мазкур аудио ёзув юзасидан Андижон шаҳар прокуратураси томонидан маълумот берилди.

Андижон шаҳар халқ таълими бўлими мудири Эралиева Сунбула Дилижановна 2019 йилнинг декабрь ойидан буён шаҳар ҳалқ таълими бўлими мудири вазифасини вақтинча бажариб келиб, бўлим фаолиятига раҳбарлик қилиб келган.

С.Эралиева Андижон шаҳар халқ таълими бўлими ва унинг тасарруфидаги муассасаларда турли лавозимларда узоқ йиллардан буён ишлаб келганлиги, ушбу давр мобайнида таълим тизими ходимлари орасида педагог-ўқитувчи номига доғ туширувчи хатти-ҳаракатларни бир неча маротаба содир қилгани учун ўз обрўсига путур етказгани, бундан ташқари, шаҳар прокуратурасига келиб тушган мурожаатлар таҳлил қилинганида, унинг ҳаракатларидан норози бўлиб йўлланган мурожаатлар ҳам ортиб бораётганлиги маълум бўлди.

2020 йилнинг 12 июнь куни ижтимоий тармоқларда С.Эралиевага тегишли бўлган аудио ёзув тарқалиб, унда жорий йилнинг 8 июндаги Андижон шаҳар халқ таълими бўлимининг бўлим бошлиқлари, ўринбосарлари, мутахассислари, методистлар, ҳисобчилар, хўжалик мудири, жами 29 нафар ходимлар иштирок этган йиғилиш жараёни ёзиб олинган.

Аниқланишича, мазкур йиғилишда ходимларга берилган топшириқлар ижроси ва ходимларнинг ижро интизоми бўлим бошлиғи томонидан муҳокама қилинган. Тарқалган аудио ёзувда С.Эралиева томонидан бир неча маротаба инсон шаънини камситувчи сўзлар ишлатилганлиги ҳолати ёзиб олинган.

Жумладан, мазкур йиғилиш бўлишидан бир неча кун аввал яъни, жорий йилнинг 5 куни халқ таълими бўлими ходимлари Н.Эргашева, Л.Абдурахимова, М.Қаххорова, А.Қўчқаров, Ш.Холматов, Ш.Юнусов ҳамда халқ таълими бўлими мудири С.Эралиевалар иштирокида таълим сифати бўйича лойиҳалар презентацияси бўлиб ўтган. Презентация давомида С.Эралиеванинг мактаб директорлари ҳақида айтган гапларини тақдимот иштирокчилари орасидан кимдир директорларга етказиб, муҳокама қилгани учун ушбу ҳолатни эслаб ўтиб, унинг гапларини мактаб директорига етказиб, муҳокама қилган бўлим ходимларига қарата “киминг етказган бўлсанг, илойим, болангни ўлигини устида ўтир” деб қўпол ва инсон қадрини камситувчи сўзларни ишлатган.

Хозирда ҳолат юзасидан шаҳар прокуратураси томонидан ўрганиш ишлари олиб борилмоқда.

Шу билан бирга ўрганиш даврида маълум бўлишича, жорий йилнинг 13 июн куни С.Эралиева вақтинча эгаллаб турган шаҳар халқ таълими бўлими мудири вазифасидан озод қилинган. Шаҳар халқ таълими бўлими мудири вазифасига эса вилоят халқ таълими бошқармасида бўлим бошлиғи бўлиб ишлаб келаётган Базаров Нуриддин Нажмидинович вақтинча мудир вазифасини бажарувчи этиб тайинланган.


Матнда хатолик топсангиз, ўша хатони белгилаб, бизга жўнатинг (Ctrl + Enter).

Бўлимга тегишли қизиқарли хабарлар

Фикр билдириш учун қайдномадан ўтишингиз сўралади ва телефон ракамни тасдиклаш керак булади!