Ҳарбий сувости кемалар қачон кашф қилинган?
Ҳарбий сувости кемалар тарихи XVII асрга бориб тақалади. Голландиялик физик олим Корнелиус ван Дреббель 1620 йилда Лондонда илк сувости кемаси лойиҳасини яратган. Ёғочдан тайёрланган ва қалин қатламли ёғ суртилган тери билан қопланган кема ўн икки нафар эшкакчи томонидан ҳаракатга келтирилган.
Ҳарбий ҳаракатларда фойдаланилган биринчи сувости кемаси америкалик Дэвид Бушнелль томонидан 1776 йилда лойиҳалаштирилган ва унга “Америка тошбақаси” деб ном берилган. Мамлакат ҳарбийлари бу кемадан Англия флотига қарши олиб борилган жангларда фойдаланишган.
Ҳарбий флот таркибига киритилган биринчи сув ости кемалари 1879 йилда Россия ҳукумати буюртмаси бўйича қурилган. Асосан соҳил зоналарини қўриқлаш учун мўлжалланганлиги сабабли уларни жанговар кема, деб аташ жуда қийин.
