Флойд Мейвезер рингга қайтиш ҳақидаги саволга жавоб берди

Бокс бўйича беш вазн тоифасида собиқ жаҳон чемпиони Флойд Мейвезер рингга қайтиш нияти йўқлигини айтди.

“Мен боксни ташладим. Эҳтимол, энди бошқа шоу-жанглар бўлмайди”, – деди Мейвезер видеоблогер Логан Полга қарши жангдан кейинги матбуот анжуманида. Саккиз раундлик кўргазмали жанг тўлиқ давом этди. Унда устунлик Мейвезер томонидан бўлган бўлса-да, нокаут қайд этилмагани боис ғолиб номи аниқланмади.

Жанг кўргазмали кураш бўлгани учун рингдан ташқарида ҳакамлар йўқ эди, шунинг учун фақат нокаут билан ғалаба қозониш мумкин эди, аммо бу амалга ошмади.

Маълумот учун, Флойд профессионал фаолияти мобайнида 50 та жанг ўтказиб, уларнинг ҳаммасида ғалаба қозонган (27 та нокаут). Логан Пол ҳисобида эса мағлубият билан тугаган битта жанг бор.