Европа Иттифоқи Россиянинг навбатдаги активларини музлатиб қўйди

Европа Иттифоқи Россиянинг қарийб 68 миллиард евролик активларини музлатиб қўйди. Бу ҳақда Politico Европа комиссияси маълумотларига таяниб хабар бермоқда.

Нашр келтирган ҳужжатга кўра, активларнинг асосий қисми Бельгияда музлатиб қўйилган – тахминан 50 миллиард евро бор. Бундан ташқари, муҳим қисми Люксембургга тегишли - 5,5 миллиард евро. Таъкидланишича, иккала давлат, шунингдек, Италия, Германия, Ирландия, Австрия ва Франция Россиянинг музлатилган активларининг 90 фоиздан ортиғини ташкил қилади.

Politico шунингдек, айни дамда ЕИ Россиянинг Европа мамлакатларида қанча миллий захиралари музлатилганини билмайди, деб ёзади. Еврокомиссия маълумотларига кўра, тахминан 33,8 миллиард евро, аммо ҳозирча бу тахминий кўрсаткич ҳисобланади.

Аввалроқ Буюк Британия Россиянинг ўн миллиард долларлик активларини музлатиб қўйгани маълум бўлган эди. Таъкидланишича, Россиянинг Украинадаги махсус операцияси бошланганидан буён мамлакатда 20,95 миллиард долларга яқин маблағ музлатилган.

Ноябрь ойи бошида активларни кузатиш ва бошқариш миллий агентлиги (ARMA) Украина томонидан мусодара қилинган Россия активлари миқдорини ҳам айтиб ўтди. Агентликнинг аниқлик киритишича, мамлакат депозити асосан Россия маблағлари ҳисобидан 38 миллион долларга ошган. Бундан ташқари, таъкидланганидек, улар олинган суммани Украина Қуролли кучларини молиялаштириш учун жўнатмоқчи.