Бокс бўйича Осиё чемпионати. Етти нафар ўзбекистонлик боксчи олтин медал учун рингга кўтарилади

Мўғулистон пойтахти Улан-Батор шаҳрида бокс бўйича катталар ўртасидаги Осиё чемпионатининг ярим финал баҳслари якунланди.

Мусобақада аёллар ва эркаклар ўртасида 10 тадан вазн тоифасида жанглар ташкил этилди. Ярим финалга 11 нафар ўзбекистонлик чарм қўлқоп усталари етиб келган эди.

Бугунги куннинг дастлабки жангида Нигина Ўктамова (-57 кг) ҳиндистонлик Жасминга қарши рингга кўтарилди. Тенг курашлар остида ўтган ярим финал баҳсида ҳакамлар қарорига кўра ғалаба ҳиндистонлик спортчига берилди — 2:3.

-75 кг вазн тоифасида Жавоҳир Абдураҳимов ҳам ярим финал жангида иштирок этди. У ҳиндистонлик Акашга қарши баҳс олиб бориб, финал йўлланмасини қўлга киритди. Бутун жанг давомида тезкорлигини намойиш этган Ўзбекистон терма жамоаси вакили 4:1 ҳисобида ғалаба қозониб, финалга йўл олди.

-85 кг вазн тоифасида Ўзбекистон терма жамоаси вакили Жасурбек Йўлдошев ярим финалда ҳиндистонлик Локешга қарши рингга чиқди. Қизиқарли кечган жангда боксчи ҳар томонлама устунликни қўлга киритиб, 5:0 ҳисобида ишончли ғалабага эришди.

-80 кг вазн тоифасида Фазлиддин Эркинбоев финал йўлланмаси учун жанубий кореялик Ким Минсеонгга қарши жанг ўтказиши керак эди. Бироқ рақиб жангдан бош тортгани сабабли Эркинбоев ғолиб деб топилди.

-60 кг вазн тоифасида Ўзбекистон терма жамоаси вакили Абдураҳмон Маҳмуджонов ярим финалда қозоғистонлик Оразбек Ассилкуловга қарши рингга кўтарилди. Қизиқарли ва муросасиз кечган баҳсда Маҳмуджонов 2:3 ҳисобида имкониятни бой бериб, мусобақани бронза медали билан якунлади.

Кун доирасидаги сўнгги ярим финал жангида -92 кг вазн тоифасида Ҳалимжон Мамасолиев қозоғистонлик Тоғамбай Сагиндик билан баҳс олиб борди. Боксчи 4:1 ҳисобида ғалаба қозониб, финал босқичига йўл олди.

Шунингдек, 6 апрель кунги дастур доирасида -80 кг вазн тоифасидаги Рухшона Парпиева тўғридан-тўғри финал босқичига йўл олган бўлса, -75 кг вазнда Азиза Зокирова ҳамда -65 кг вазн тоифасида Абдуллоҳ Мадаминов олтин медал учун рингга кўтарилиш имкониятини қўлга киритган эди.

Финал, аёллар:
-75 кг: Азиза Зокирова (Ўзбекистон) – Бао Сзи (Хитой)
-80 кг: Рухшона Парпиева (Ўзбекистон) – Надежда Рябес (Қозоғистон)
Финал, эркаклар:
-65 кг: Абдуллоҳ Мадаминов (Ўзбекистон) – Бунджонг Синсири (Таиланд)
-75 кг: Жавоҳир Абдураҳимов (Ўзбекистон) – Сабиржан Аккаликов (Қозоғистон)
-80 кг: Фазлиддин Эркинбоев (Ўзбекистон) – Ҳусайн Ишаиш (Иордания)
-85 кг: Жасурбек Йўлдошев (Ўзбекистон) – Нурбек Оралбай (Қозоғистон)
-90 кг: Ҳалимжон Мамасолиев (Ўзбекистон) – Парвиз Каримов (Тожикистон)

20 та вазн тоифасида тўлиқ таркибда иштирок этган Ўзбекистон терма жамоасининг 4 нафар боксчиси бронза медалига эга бўлди, етти нафар чарм қўлқоп устаси олтин медал учун баҳс олиб боради.