Европа Иттифоқи Грузия демаршини эълон қилди
Европа Иттифоқининг Грузиядаги элчиси Павел Герчинский душанба куни Грузия бош вазири ўринбосари, иқтисодиёт вазири Леван Давиташвилига Тбилиси ва Москва ўртасида тўғридан-тўғри авиақатновлар тикланиши муносабати билан расмий демарш эълон қилди. Бу ҳақда Интерпресснеwс хабар бермоқда.
Герчинский билан биргаликда Европа Иттифоқининг барча 27 давлати элчилари Грузия бош вазири ўринбосари билан учрашди.
“Биз унга (Давиташвили – таҳр.) Грузия ҳукуматининг Россияга тўғридан-тўғри рейсларни тиклаш ҳақидаги қароридан афсусда эканимизни айтдик. Биз бу қарор ЕИнинг барча 27 аъзосининг Россияга тўғридан-тўғри рейсларни амалга оширмаслик ва Россия самолётларининг ЕИга аъзо давлатлар ҳудуди устидан учишига йўл қўймаслик тўғрисидаги якдил қарорига зид эканлигини хабар қилдик”, — деди элчи журналистларга.
Герчинскийнинг таъкидлашича, парвозларни қайта тиклаш қарори Россия томонидан қабул қилинган бўлса-да, бунинг учун Грузия ҳукуматининг ҳам розилиги зарур.
“Шунингдек, биз бу қарор Россияни яккалаб қўйиш ва Россияни Украинада давом этаётган шафқациз, тажовузкор уруш бўйича ҳаракатларини ўзгартириш учун босим ўтказиш қароримизга зид эканлигидан хавотир билдирдик”, деди европалик дипломат.
Грузия бош вазири ўринбосари, ўз навбатида, европалик элчиларни Евроиттифоқ санкциялари остидаги компаниялар парвозларни амалга оширмаслигига, барча келган россияликлар синчиклаб текширилишига ишонтирди.
