Эрон ва Россия ўз валюталарида савдо қилади
Эрон ва Россия ўзаро ҳисоб-китоблар учун деярли бутунлай миллий валюталарга ўтди, деди бош вазир ўринбосари Александр Новак Ислом инқилобининг 45 йиллиги муносабати билан ўтказилган қабулда.
«Биз деярли бутунлай миллий валюталарда ҳисоб-китобларга ва банк хабарларини миллий (тизимларимизга) узатишга ўтдик. Бу эса иқтисодларимиз ривожига тўсқинлик қилмоқчи бўлганларга қарам бўлмаслик имконини беради... Ҳақиқатан ҳам бизда умумий жиҳатлар кўп, биз икки томонлама ва кўп томонлама форматда ишлаймиз. Эронлик дўстларимиз Шанхай ҳамкорлик ташкилоти ва БРИКСга қўшилди. Шунингдек, Россия ва ушбу ташкилотларга аъзо бўлган барча давлатлар билан ҳамкорликни ривожлантириш учун улкан салоҳият мавжуд», — дея унинг сўзларидан иқтибос келтиради ТАСС.
Ғарб санкциялари остидаги ҳар икки давлат ҳам долларда тўловларни амалга ошириш ва халқаро тўлов тизимларидан фойдаланишда қийинчиликларга дуч келмоқда.
