Буюк Британия ўзбекистонлик тиббиёт соҳаси вакиллари учун 10 мингдан зиёд иш ўрни таклиф этмоқда

Мамлакатимиз миграция сиёсатида сезиларли ўзгаришлар кузатилмоқда. Ҳозир “меҳнат муҳожири” тушунчасига нисбатан муносабат тубдан ўзгарган. Бугун халқаро меҳнат бозорига мамлакатимиз нафақат, халқ тили билан айтганда, “қора ишчи”, балки олий маълумотли мутахассислар таклиф эта бошлади. Табиийки, тажрибали ўзбек мутахассисларига талаб борган сари ортмоқда.

Дарвоқе, миграция географиясини кенгайтириш, хусусан, айни йўналишда Европанинг ривожланган давлатлари билан ҳамкорлик қилиш давлатимиз раҳбари томонидан қўйилган энг муҳим вазифалардан биридир.

Шу маънода, сўнгги йилларда Буюк Британия билан миграция соҳасидаги алоқа ривожланиб бораётгани эътиборли.

Маълумот ўрнида айтиш жоиз, жорий йил 1-чоракда жами 23 535 юртдошимиз вақтинча ишлаш учун хорижга жўнатилди. Улардан 795 нафари Буюк Британияда. Аввал юртдошларимизни, асосан, қишлоқ хўжалигида ишлаш учун қабул қилган Бирлашган Қироллик энди тиббиёт соҳаси вакиллари учун ҳам янги иш ўринлари таклиф этмоқда.

Тошкент шаҳридаги “Ишга марҳамат” моно марказида Буюк Британиянинг “NEU Professionals” рекрутинг агентлиги томонидан айни соҳа вакиллари учун янги имкониятлар таклиф этилди.

Шу муносабат билан бўлиб ўтган матбуот анжуманида иш берувчи талаби, ушбу юртда ишлаш тартиби батафсил тушунтирилди.

2013 йил чет эллик тиббиёт мутахассисларини Буюк Британиянинг Оксфорд университети шифохонаси ва бошқа тиббиёт муассасалари учун ёллашга кўмаклашиш мақсадида ташкил этилган “NEU Professionals” рекрутинг компанияси эндиликда хориждан Aнглия ва Уэльсга кадр етказиб бериш билан ҳам шуғулланмоқда.

Aнглия делегацияси вакиллари Буюк Британияда тиббий ходимларга талаб жуда юқори эканини таъкидлаб,ўзбекистонлик 10 мингдан ортиқ мутахассисни чет тилига ўқитиш орқали ишга қабул қилиш, 3 000 доллар миқдорида ойлик маош тўлашга тайёрлигини билдирдилар.

– Афсуски, Буюк Британиядаги ҳамшираларнинг аксарияти 50 ёшдан ошган, – дейди компания раҳбари Эдита Озбек. – Шу боис муайян тажрибага эга ёш ҳамшираларга талаб кучли. Ишга жалб қилинаётганларга қулай шароит яратиш, яхши маош бериш баробарида, уларнинг хавфсизлиги таъминланади, ҳуқуқи, манфаати ҳимоя қилинади. Ўн йилдан буён кўп давлатлар билан ҳамкорлик қиляпмиз. Ўзбекистон билан ҳам яхши алоқа ўрнатиб, алмашинув дастурларини йўлга қўймоқчимиз. Бу ҳамкорлик ҳар икки давлат иқтисодиёти ва соҳа ривожи, хусусан мутахассислар тажрибасини ошириш учун муҳим.

Aнглия томони ўзбекистонлик тиббиёт соҳаси вакиллари, жумладан ҳамширалар ўрта тиббий ходим сифатида фаолият юритиш билан чекланиб қолмаслиги, балки қобилияти, интилиши, тажрибаси ва тил билишидан келиб чиқиб, вазифаси нуқтаи назаридан ўсиш имконига эга бўлишини таъкидлади.

– Лойиҳа ҳақида эшитиб, қизиқиб қолдим, – дейди НаврўзаЯминова. – Тиббиёт коллежини тамомлаб, бир муддат патронаж ҳамшира бўлиб ишладим. Ҳозирги иш жойим стоматология клиникаси. Инглиз тилини ўрганиб, Буюк Британияга бормоқчиман. Хорижда фаолият кўрсатиб нафақат оиламга моддий жиҳатдан кўмаклашиш, балки тажриба алмашиш, касбий ривожланиш орқали халқаро талабга жавоб берадиган мутахассис бўлиб қайтмоқчиман.

Ковентри университетининг Тошкентдаги рақамли иқтисодиёт ва агротехнология йўналишларига ихтисослашган филиали билан ҳамкорликда иш олиб бораётган мазкур компания келгусида Янги Зеландия, Aвстралия, Ирландия каби инглиз тилида сўзлашувчи давлатлардан ҳам Ўзбекистонга бўш иш ўринлари таклиф этишни йўлга қўйиш ниятида.

Aнжуманда кўтарилган масалалар юзасидан “йўл харитаси” тузилиб, амалий ҳаракатга ўтиш йўллари белгилаб олинди.