Бухорода банк ходимлари таббий офатдан жабрланганларга ажратилган фоиссиз кредитларни ўзлаштириб юборди
Гап шундаки, «Ўзсаноатқурилишбанк» бош офиси ходими ҳамда шу банкнинг «Тўқимачилик» филиали бошқарувчиси номида замонавий иссиқхоналар мавжуд бўлган.
Шу йилнинг апрелида Бухоро вилоятида юз берган кучли шамол ва ёғингарчилик 141,6 миллиард сўм зарар келтирган. Шу сабаб Президент кўрсатмаси билан етказилган зарарини бартараф этиш мақсадида банкларнинг фоизсиз кредит ажратиши йўлга қўйилган.
Гарчи вилоятда юз берган кучли довул оқибатида бу икки шахснинг мулкига зиён етмаган бўлса-да, икки банкир ўзаро тил бириктирган. Аввалига ўзига тегишли иссиқхоналарга жиддий талафот етгани тўғрисида қалбаки ҳужжатлар тайёрлаган. Бу ҳам етмагандек, банк кенгашини огоҳлантирмасдан жами 2 миллиард сўм фоизсиз кредит маблағларини ажратиб, ўз иссиқхоналарининг ҳисоб рақамига кўчирган.
ДХХ вилоят бошқармаси ҳамда Бош прокуратура ҳузуридаги иқтисодий жиноятларга қарши курашиш департаментининг ўрганишларида фоизсиз кредитлар мақсадли фойдаланилмагани маълум бўлди. Ҳозирда иккала банкирга нисбатан жиноий иши қўзғатилган.
Эслатиб ўтамиз, Бухоро вилоятидаги табиий офат оқибатларини бартараф этиш учун Давлат бюджетидан 164 миллиард сўм ажратилган.
