Бухорода аёл жазманини деб эрига, оиласига хиёнат қилди. Оқибати эса нохуш тугади

Аҳмадали Суфияхон исмли қиз билан танишиб, уни йўлдан уришни мақсад қилди. Шу ниятда чиройли сўзлаб, ўзига бутунлай ром этди. Аёл ҳам хушомадларга алданиб уйини, турмуш ўртоғини унутди. Доимий мулоқотлар аста-секин жиддийлашиб бораверди. Хуфиёна учрашувлар кўпайди.

Аёлни батамом ўзига боғлаб олган Аҳмадали энди мақсади сари “одимлади”. Яъни, Суфияхондан қарз деб 200 АҚШ доллари, бир ойдан сўнг яна шунча пул олди.

Орадан кўп ўтмай, Суфияхон дугонасининг тўйига янги кийим харид қилмоқчи бўлиб, Аҳмадалидан қарзларини сўради. У қарзини қайтариш ўрнига 1000 АҚШ доллари топиб бермаса, шарманда қилишини айтиб, эркак кишига ярашмайдиган “иш”га қўл урди. Яъни, ёлланма суратчи орқали олдирган суратларини аёлнинг ишхонаси ва турмуш ўртоғига жўнатиш билан қўрқитиб, таҳдид қилди.

Суфияхон ноилож кўнди. Иш жойида, ҳамкасблари орасида шарманда бўлишидан ҳамда оиласи бузилишидан қўрқиб, тилла тақинчоқларини сотди. 1000 АҚШ доллари тўплаб, Аҳмадали билан келишилган жойда учрашди.

– Бўларкан-ку, хоним! – деди Аҳмадали кесатиб.

– Энди кўзимнинг олдида, суратларни ўчириб ташланг, – Суфияхон шундай дея Аҳмадалига ижирғаниб қаради.

– Овсарингни топибсан, – деди Аҳмадали ҳаёсизларча кулиб.

– Илтимос, нима десангиз розиман? Фақат шармандаликдан мени қутқаринг, –дея Суфияхон қўлларини илтижоли қовуштириб, ўтириб олди.

– Буниси кетмайди. Яна 1000 доллар келтириб берасан. Шундан сўнг, суратларни ўчириб ташлайман ва сени қайтиб безовта қилмайман, – деди у безбетларча.

– Бунча пулим йўқ. Тиллаларимни сотиб бердим, – деди Суфияхон йиғи-сиғи билан.

– Бас қил. Топасан, вассалом. Акс ҳолда, фотосуратларни интернетга тарқатиб юбораман. Сенга ойнинг охиригача муҳлат.

Аҳмадали шундай деб, ўлжани қўлга киритиб, жуфтакни ростлади. Аёл сувга тушган мушукдай шумшайиб қолаверди. Нима қилсин, ўзи пиширган ош. “Уятни йиғиштириб, қўйишнинг жазоси шу”, деди ўзига-ўзи пичирлаб.

Шу тахлит Суфияхон яна жамғармаларини йиға бошлади, етмаганини яқин дугонасидан олиб, 1000 АҚШ долларини икки қўллаб Аҳмадалига тутқазди.

– Энди суратларни ўчириб ташларсан, – деди ялиниб.

– Хавотирланма. Фотосуратларни ўчириб, сени қайтиб безовта қилмайман, –деди Аҳмадали.

Аҳмадали “режа”си ими-жимида битаётганидан хурсанд эди. У 2 минг АҚШ долларини олти ойгача сарфлаб, куну тунини кайф-сафо билан ўтказди. Сўнгра яна Суфияхонга телефон қилди. Бу гал эркак киши олди. У табиийки, Суфияхонни сўради. Аммо рақам эгаси аёлни танимаслигини билдирди. Шундан кейин Аҳмадали Суфияхоннинг ишхонасига борди. Тинимсиз таҳдидлардан сабр косаси тўлган аёл Аҳмадалининг устидан ҳуқуқни муҳофаза қилувчи органларга мурожаат қилди.

Шу тариқа, тезкор ходимлар товламачини ашёвий далил билан қўлга олишди.