БМТ Тараққиёт дастури кўмагида Ўзбекистонда 150 дан ортиқ маҳаллада янги ижтимоий объектлар қурилади
Жорий йилнинг 28 март куни мамлакат чекка ҳудудларида яшовчи аҳолининг ижтимоий-иқтисодий турмуш тарзини яхшилашга қаратилган «Қишлоқ жойларни комплекс ривожлантириш» лойиҳасининг иккинчи босқичини амалга ошириш тўғрисида президент қарори имзоланди.
Белгиланган вазифаларни бажариш мақсадида Иқтисодиёт ва молия вазирлиги ва БМТ Тараққиёт дастури биргаликда Ислом тараққиёт банки (ИТБ) молиявий кўмагида «Қишлоқ жойларни комплекс ривожлантириш» лойиҳасининг 2024-2028 йилларда Самарқанд, Қашқадарё ва Сурхондарё вилоятлари 21 туманидаги 157 маҳаллани қамраб оладиган иккинчи босқичини ишга туширмоқда.
Янги лойиҳа йўл-транспорт инфратузилмаси, муҳандислик-коммуникация тармоқлари, электр таъминоти тизимларини такомиллаштириш, болалар боғчалари, мактаблар ва қишлоқ поликлиникалари каби ижтимоий соҳа объектларини қуриш ва реконструкция қилишда ресурс тежовчи ва экологик тоза технологияларни қўллаш орқали қишлоқ аҳолисининг турмуш даражасини оширишга қаратилган.
Шунингдек, тегишли яшил ва энергия тежамкор ҳамда рақамли ечимлардан фойдаланган ҳолда қишлоқларни ривожлантириш режаларини ишлаб чиқиш ва амалга оширишда архитекторлар, муҳандислар жамоалари, маҳаллий ҳокимият органлари ва бошқа манфаатдор томонларнинг имкониятларини кенгайтириш ва салоҳиятини мустаҳкамлаш режалаштирилган.
Мазкур лойиҳа қурилиш ва сармоявий лойиҳаларни амалга ошириш учун асос бўладиган маҳаллаларни ривожлантириш режаларини ишлаб чиқиш орқали жамоаларга ўз ривожланиш устуворликлари ва эҳтиёжларини аниқлаш имконини бериши кутилмоқда.
Лойиҳани амалга ошириш натижасида 622 мингдан зиёд қишлоқ аҳолисининг турмуш шароити яхшиланиши режалаштирилган.
Лойиҳанинг 2022 йилдан то ҳозирги кунгача амал қилаётган биринчи босқичи ҳам худди шундай вазифаларни қўйган бўлиб, Қорақалпоғистон Республикаси, Хоразм, Бухоро ва Навоий вилоятларининг 20 та мақсадли туманларида 170 та маҳалла фуқаролар йиғинидаги қишлоқ аҳолисининг турмуш даражасини, ҳамда аҳолининг касбий малакасини ошириш мақсадида чекка қишлоқларда ҳам объектларни қуриш ва таъмирлаш ишларини ўз ичига олган. Айни пайтда маҳаллий аҳолининг фаол иштирокида 2024-2025 йилларда қуриладиган ёки реконструкция қилинадиган 900 та кичик лойиҳа танлаб олинди.
