БМТ Кобулдаги масжидга уюштирилган ҳужумни қоралади
Жаҳон ташкилоти Афғонистоннинг амалдаги расмийларини мамлакатда терроризмнинг барча кўринишларининг олдини олиш учун аниқ чоралар кўришга чақирди.
“БМТнинг Афғонистонга Ёрдам Миссияси чоршанба куни Кобулдаги масжидга уюштирилган ва ўнлаб тинч аҳолининг ўлимига сабаб бўлган ҳужумни қоралади”, деб хабар берди БМТ матбуот хизмати.
“Кечаги Кобулдаги масжидга қилинган ҳужумни афсусланамиз, бу охирги ҳафталарда 250 дан ортиқ одамнинг ҳаётига зомин бўлган ва яраланган ҳужумлар сериясининг охиргиси. Бу сўнгги йилдаги тинч аҳоли қурбонларининг энг юқори сони”, — дейилади БМТнинг Афғонистонга Ёрдам Миссияси твиттерда эълон қилинган қисқа баёнотда.
“Хавфсизлик билан боғлиқ вазият ёмонлашгани сабабли, БМТ де-факто расмийларни (Толибон) Афғонистонда терроризмнинг барча шаклларининг олдини олиш бўйича аниқ чоралар кўришга чақирмоқда. Кичик жамоалар кўпроқ қўллаб-қувватланиши керак ва айбдорлар жавобгарликка тортилиши керак. Биз ҳалок бўлганларнинг оила аъзоларига чуқур ҳамдардлигимизни ва жароҳатланганларнинг тезроқ соғайиб кетишини билдирамиз”, деди БМТнинг Афғонистонга Ёрдам Миссияси вакиллари.
17 август, чоршанба куни Кобул шимоли-шарқидаги Сиддиқия масжидида кечки намоз вақтида кучли портлаш содир бўлиб, кўп сонли одамлар ҳалок бўлди ва яраланди.
