БМТ Инсон ҳуқуқлари бўйича Олий комиссари Мишел Бачелет Хитойга келди

БМТнинг Инсон ҳуқуқлари бўйича Олий комиссари Бачелет 23 май душанба куни Хитойга келди.

Хитой Ташқи ишлар вазирлиги матбуот котиби Ван Венбиннинг айтишича, Пекин Олий комиссарнинг ташрифини олқишлайди. Дипломатнинг сўзларига кўра, Бачелет ташриф давомида Хитой раҳбарлари ва тегишли давлат идоралари вакиллари билан учрашади. Бундан ташқари, ташкилот вакили Гуангдонг провинцияси ва Шинжон-Уйғур автоном районига ташриф буюради.

Ташрифдан мақсад томонлар ўртасидаги ўзаро ҳамкорликни кучайтириш орқали бутун дунёда инсон ҳуқуқларини таъминлашда ижобий рол ўйнаш, деди Венбин.

“Анадолу” ахборот агентлиги мухбирининг “Олий комиссар Шинжон-Уйғур автоном районига ташрифи чоғида бирон-бир қамоқхона, тергов изолятори ёки қайта тайёрлаш марказига ташриф буюрадими?” деган саволига Хитой дипломатияси вакили: “Пекин ташриф давомида Бачелетга зарур шарт-шароитларни тақдим этади. Ташрифдан мақсад ўзаро ҳамкорлик ва ҳамкорликни кучайтириш орқали халқаро инсон ҳуқуқлари идеалига ҳисса қўшишдир. Биз бу ташрифдан сиёсий манипуляция учун фойдаланишга қаршимиз”, дейиш билан чекланди.

Вангнинг таъкидлашича, CОVID-19 га қарши чоралар туфайли журналистларга делегация билан саёҳат қилиш ва Бачелетнинг алоқаларини кузатишга рухсат берилмайди.

БМТ Инсон ҳуқуқлари бўйича Олий комиссари бошқармасининг маълум қилишича, Бачелет Хитойга 6 кунлик ташрифи доирасида сиёсий арбоблар, шунингдек, илмий доиралар ва фуқаролик жамияти вакиллари билан учрашади.

Ташриф Хитой жанубидаги порт шаҳри, Гуандун маъмурий маркази – Гуанчжоу шаҳрига саёҳатдан бошланади. Бу ерда БМТ Олий вакили маҳаллий университет талабалари билан мулоқот олиб боради.

Мишел Бачелетнинг ташрифи 28 майгача давом этади.