БМТнинг Гуманитар масалаларни мувофиқлаштириш идораси ходими Жули Беланжернинг сўзларига кўра, Марказий ва Ғарбий Африканинг 11 та давлатида 760 минг киши тошқинлардан жабр кўрган, 200 дан ортиқ одам вафот этган. Ёмғирлар эса ҳамон давом этмоқда.

Сенегалда йиллик ёғингарчилик даражаси бир кунда қайд этилган, Буркина-Фасода ёмғирлардан кейин фавқулодда ҳолат эълон қилинган, 13 киши ҳалок бўлган. Гана шимолида ҳам бир нечта қурбонлар қайд этилган. Нигерда эса 65 киши ҳаётдан кўз юмган.

Нигериянинг Борно штатида 26 минг киши уйсиз қолган, 30 киши вафот этган. Ноқулай об-ҳаво шароити, шунингдек, Камерун ва Чадга ҳам ўз таъсирини кўрсатган.

Суданда 103 киши вафот этган, 500 мингдан ортиқ одам жароҳатланган, 100 мингдан ортиқ уй вайрон бўлган.

Ёмғирлар давом этаётгани ва озиқ-овқат таъминоти тугаганлиги сабабли БМТ мамлакатда гуманитар вазият янада оғирлашади, деб ҳисобламоқда.

Таъкидланишича, ёмғирлар сабаб Нил 17 метрга кўтарилиб, 1946 ҳамда 1988 йилларда қайд этилган рекорд даражадан ҳам ошиб кетган.

Маълумот ўрнида, ўтган йили Африканинг марказий ва ғарбий қисмида юз берган ёғингарчилик катта тошқинларга олиб келган ва натижада 11 мамлакатда 1 миллиондан ортиқ аҳоли зарар кўрган эди.

Қайд этилишича, ёмғирли мавсум давом этаёргани боис БМТ жорий йилда қурбонлар сони аввалги кўрсаткичлардан ошиб кетиши мумкин деб таъкидламоқда.