Банкларнинг муаммоли кредитлари улуши 4,7 фоизгача ўсди

1 июнь ҳолатида Ўзбекистондаги банкларнинг муаммоли кредитлари улуши берилган кредитлар умумий ҳажмининг 4,7% ини ташкил этди. Марказий банк маълумотлари бунга гувоҳлик бермоқда.

Маълумот учун: Муаммоли кредитлар (NPL, Non-performing loan, ишламайдиган кредитлар) муддатидан 90 кундан ортиқ вақт ўтган, қониқарсиз, шубҳали ва умидсиз деб таснифланган кредитларни ўз ичига олади.

Банк тизими 2020 йилни 2,1 фоизли муаммоли кредитлар улуши билан якунлаган бўлса, 1 февраль ҳолатида бу кўрсаткич 2,7 фоизга, 1 март ҳолатида 2,8 фоизга ёки 7,8 трлн сўмга (жами кредит портфелида — 280,2 трлн сўм), 1 апрель ҳолатида — 3,6% гача ёки 10,1 трлн сўм (283,4 трлн сўм), 1 май ҳолатида — 4,4% гача ёки 12,9 трлн сўмга (292 трлн сўм) ўсди.

1 июнь ҳолатига кўра, бу кўрсаткич 4,7 фоизга ёки 14 трлн сўмга (297 трлн сўм) кўтарилди, яъни бир ой ичида NPL ҳажми 8,3 фоизга ошди.

Муаммоли кредитлар улуши давлат улушига эга бўлган 13 та банкнинг 9 тасида ўсди (жами 9,1 фоизга — 12,2 трлн сўмгача). Хусусан, Ўзбекистон Миллий банкининг NLP кўрсаткичи 2,6 трлндан 3 трлн сўмгача (36 фоизга), «Ўзсаноатқурилишбанк» — 1,5 трлндан 1,7 трлн сўмга, «Агробанк» — 1,1 трлн сўмдан 1,3 трлн сўмгача, Ҳалқ банки — 1,1 трлндан 1,2 трлн сўмгача (45,7%), «Ипотека Банк» — 1,2 трлндан «Микрокредитбанк» — 331 млрддан 705 млрд сўмгача (91,3%), «Алоқабанк» — 256 млрддан 291 млрд сўмгача, Asia Alliance Bank — 163 млрддан 204 млрд сўмгача, «Ўзагроэкспортбанк» — 34 млрддан 52 млрд сўмгача ўсган.

Ўз навбатида, NPL «Асакабанк»да ўзгармаган бўлса, «Қишлоқ қурилиш банк», «Туронбанк» ва «Пойтахтбанк»да пасайди.

Кредит портфели сифати хусусий банклар ўртасида қарийб ўзгармади (NPL ўсиши 2,6% гача), бироқ «Туркистон» (82,5% муаммоли кредитлар), Hi-Tech Bank (89,3%) ва Madad Invest Bank (28,9%) банкларида вазият мураккаблигича қолмоқда. Hamkorbank NLP кўрсаткичи 349 млрддан 270 млрд сўмгача пасайтира олган бўлса, «Ипак йўли»да аксинча, 190 млрддан 262 млрд сўмгача кескин ўсиш кузатилди.

МБ Кредит ташкилотлари фаолиятини тартибга солиш методологияси департаменти директори Санжар Носировнинг қайд этишича, коронавирус пандемияси туфайли мамлакатдаги ишбилармонлик муҳити кескин сустлашди, корхоналар ва аҳоли карантин чекловлари натижасида банклар олдидаги қарздорликни қоплашда қийинчиликларни бошдан кечирмоқда.

Муаммоли кредитлар билан боғлиқ вазиятга президент Шавкат Мирзиёев ҳам бир неча марта эътибор қаратди. Хусусан, 12 май куни бўлиб ўтган видеоселектор йиғилишида у ҳудудлардаги муаммоли кредитлар бўйича масъул раҳбарларни танқид қилган эди. Соҳалар кесимида мавжуд муаммоли кредитлар саноатда — 3 трлн сўм, савдо ва хизмат кўрсатишда — 2,1 трлн сўм, қишлоқ хўжалигида — 1,8 трлн сўм, қурилишда — 978 млрд сўм, транспорт ва коммуникацияда — 547 млрд сўмни ташкил этиши айтиб ўтилди. Ҳудудлар кесимида Жиззах, Самарқанд Сурхондарё ва Тошкент вилоятларининг ҳар бирига қарийб 1 трлн сўмдан муаммоли кредитлар тўғри келмоқда.

Президент бу маблағларни қайтаришга бош вазир ўринбосарлари, вилоят, туман ва шаҳар ҳокимлари, сектор ва тижорат банклари раҳбарлари шахсан жавоб беришини айтди.