Арманистон расмийлари Россия оммавий ахборот воситаларини гибрид уруш олиб боришда ва дезинформацияда айбламоқда
Бу ҳақда Арманистон Бош вазири аппарати раҳбари Арайик Арутюнян баёнот берди.
Бунга Россиянинг НТВ телеканалининг Арманистон ҳукумати биносидаги АҚШнинг десантчилари ҳақидаги сюжети сабаб бўлди. Унда айтилишича, Ереванда намойишчилар ҳукумат биносига бостириб кириб, у ерда ўқув машғулотлари учун келган америкалик десантчиларга дуч келишган.
"Афтидан, Россия оммавий ахборот воситаларида Арманистонга қарши бошланган гибрид урушда уларга машҳур эртакдаги каби, ким кўпроқ ёлғон гапирса, саройнинг(Кремлнинг) ярмини олади, деб ваъда берилганга ўхшайди", - деб ёзди Арутюнян ўзининг Facebook'даги саҳифасида.
"Россия телеканалларининг "энг ёмон" пропагандачилари арманлар эканлиги ҳайратланарли: Маргарита Симонян, Тигран Кеосаян, Арам Габрелянов, Семён Багдасаров, Роман Бабаян, Сергей Кургинян, Андраник Мигранян ва бошқалар", - деган Арутюнян.
