АҚШда ICE’га қарши оммавий норозилик тўлқини бошланди

АҚШнинг Миннеаполис шаҳри ва бошқа штатларида Иммиграция ва божхона назорати хизмати (ICE)га қарши оммавий норозилик намойишлари ўтказилмоқда. Бунга сабаб — ICE рейди вақтида АҚШ фуқароси Рене Николь Гуднинг ўлдирилиши бўлди.

Миннесота ва бошқа штатлар аҳолиси ICE ходимларининг ҳаракатларига қарши кўчаларга чиқди. 37 ёшли Рене Николь Гуд жорий йил бошида Миннеаполисда ўтказилган рейд пайтида отиб ўлдирилган.

Жума куни, 9 январда, минглаб одамлар Миннеаполис кўчаларига «ICE out of MPLS» деган ёзувли плакатлар билан чиқишди. Норозилик акциялари, АҚШ ОАВ маълумотларига кўра, ICE ходимлари жойлашган бўлиши мумкин бўлган камида икки меҳмонхона олдида ҳам ўтказилди.

Миннесота жамоат хавфсизлиги департаменти марказий ҳудуддаги меҳмонхоналардан бири олдида ноқонуний тўпланишда айбланган бир қатор намойишчилар қўлга олинганини маълум қилди. Маҳаллий ҳокимият норозиликлар тартибсизликларга айланиб, мулкка зарар етказилганини билдирди.

Америка ОАВлари хабар беришича, дам олиш кунлари мамлакат бўйлаб «ICE Out for Good» шиори остида юзлаб янги норозилик акциялари режалаштирилган. Акцияларга инсон ҳуқуқларини ҳимоя қилувчи ва мигрантлар ташкилотлари, жумладан, Америка фуқаролик эркинликларини ҳимоя қилиш иттифоқи (ACLU), MoveOn ва Voto Latino даъват қилган.

Ташкилотчиларнинг таъкидлашича, акциялар тинч характерга эга бўлиб, иммиграция идоралари томонидан қўлланилаётган зўравонликка, шунингдек ICE рейдларининг жамоалар ва мактабларда ўтказилишига қарши қаратилган.

9 январ куни ICE ходимининг мобил телефонига ёзиб олинган видео тарқалди. Унда Рене Гуд агентга хотиржамлик билан ундан ғазабланмаётганини айтгани, шундан сўнг ўқ узилгани акс этган.

ОАВларга кўра, ушбу кадрлар АҚШ федерал ҳокимияти тақдим этган расмий версияга зид келади.

АҚШ президенти Дональд Трамп аввалроқ аёл ICE ходимини машина билан қасддан уриб кетишга уринганини айтган эди. Бироқ Миннеаполис мэри Жейкоб Фрей бу баёнотни «бемаънилик» деб атаб, видеоязувларга ишора қилди. У ICE’ни шаҳарда беқарорлик яратаётганликда айблаб, хизмат ходимларини шаҳарни тарк этишга чақирди.

АҚШ Ички хавфсизлик вазирлиги раҳбарининг ёрдамчиси Триша Маклафлин эса отишма ICE операциясига зўравонлик билан тўсқинлик қилишга уринган «тартибсизлик иштирокчилари» сабабли юз берганини билдирди.

Миннесота губернатори Тим Уолз федерал ҳокимият реакциясини «тарғибот» деб атаб, «тўлиқ, адолатли ва тезкор тергов» ўтказилишини ваъда қилди.

2025 йил охиридан бери АҚШ ҳукумати ноқонуний мигрантларни қўлга олиш бўйича кенг кўламли операциялар ўтказмоқда. Декабрь ойида шундай рейдлардан бирида 400 нафардан ортиқ киши ушланган.

Июнь ойида Сан-Францискода ўтказилган ICE рейдлари ҳам оммавий норозиликлар ва тартибсизликларга сабаб бўлган. Шундан сўнг АҚШ президенти Калифорнияга Миллий гвардия ва денгиз пиёдалари бўлинмаларини юборган, бу эса штат раҳбариятининг қаршилигига учраган.