Алимент тўлашдан бош тортганларга қандай чора кўрилади?
Ўзбекистон Республикаси Президенти Администрацияси ҳузуридаги Ахборот ва оммавий коммуникациялар агентлигида бўлиб ўтган брифингда Мажбурий ижро бюроси ахборот хизмати раҳбари Фаррух Тошпўлатов соҳада амалга оширилаётган ишлар юзасидан маълумот берди.
Таъкидланишича, Ўзбекистон Республикасининг “Суд ҳужжатлари ва бошқа органлар ҳужжатларини ижро этиш тўғрисида”ги Қонунига биноан Бюронинг давлат ижрочилари томонидан қарздор ва унинг мол-мулки турган жойи ҳақида маълумотлар бўлмаганда, уларни қидириш тўғрисида қарор қабул қилинади.
Бугунги кунда Мажбурий ижро бюроси 3 минг нафардан кўпроқ қарздорни қидирмоқда. Уларнинг мингдан ортиғи чет элга чиқиб кетган.
Бюро органлари томонидан амалга оширилган тезкор-қидирув фаолият натижасида жорий йилнинг ўтган даврида қарздорлиги туфайли 7 минг 800 дан зиёд жисмоний шахсга нисбатан қидирув эълон қилинган бўлиб, шундан 4 минг 500 нафардан ортиғи топилиб, мажбурий ижро ҳаракатлари ўтказилган.
Ҳозирда 3 минг 264 нафар қарздорни қидириб топиш чоралари кўрилмоқда. Айтиш жоизки, ушбу шахсларнинг 2 минг 149 нафари республика ҳудудида яшириниб юрганлиги, 1 минг 115 нафари эса чет элга турли мақсадларда чиқиб кетганлиги аниқланган.
Қидирувдаги шахслар топилиши натижасида қарздорлардан 30 миллиард 700 миллион сўм, шу жумладан, 22 миллиард 800 миллион сўм алимент пуллари ундирилиб, вояга етмаган фарзандларнинг моддий таъминот олишлари таъминланган.
Бюро органларида суд ҳужжатларига асосан фарзандларни оналари тарбиясига олиб бериш билан боғлиқ ижро ишлари доим долзарб бўлиб келган. Ҳозирда 80 дан ортиқ ижро ишлари бўйича қидирувда бўлган фарзандларнинг оналари қарамоғига олиб берилиши бўйича 57 та ижро ишлари амалда тамомланди. Қолган ишлари бўйича қидирув ҳаракатлари давом этмоқда.
Шунингдек, жорий йилда қидирув эълон қилинган 4 минг 222 та автотранспорт воситасининг 3 минг 73 таси, яъни 73 фоизи тезкор тадбирлар натижасида топилди. Қолган 1 минг 149 та автотранспортни топиш бўйича қидирув давом этмоқда. Қидириб топилган 3 минг 73 таси автотранспорт воситаси ундирувга қаратилиши натижасида 40 миллиард 500 миллион сўмлик қарздорлик ундирилиши таъминланган.
Мутахассиснинг қайд этишича, алимент тўлашдан бош тортган, унга нисбатан қидирув эълон қилинган қарздорлар топилса, қарздор чет элдан топилиб, Ўзбекистонга олиб келингач, алимент қарздорлигини ихтиёрий тўламаган тақдирда, дастлаб унга нисбатан Маъмурий жавобгарлик тўғрисидаги кодекснинг 474-моддасига асосан 15 суткагача маъмурий қамоқ жазоси қўлланилади. Шундан кейин ҳам карздорлик тўланмаган тақдирда ЖКнинг 122-моддасига асосан жиноят иши қўзғатилиб, жавобгарлик масаласи ҳал қилинади.
