Air Samarkand авиакомпанияси Тошкентдан Абу Дабига илк рейсни амалга оширди

Airbus А321 самолёти 194 нафар йўловчиси билан тўлиқ юкланган ҳолатда аниқ жадвал бўйича парвоз қилди. Янги йўналиш мавсумий дастурга киритилган бўлиб, у жума кунлари йўловчилар учун қулай вақтда амалга оширилади.

Тошкент халқаро аэропортида биринчи рейс йўловчилари учун байрам дастурхони безатилиб, тантанали рўйхатдан ўтиш маросими бўлиб ўтди. Йўловчилар ва меҳмонлар экипаж билан эсдалик учун суратга тушишди – бу янги йўналишнинг ёрқин бошланишидир.

Самолёт Тошкентдан соат 10:30 да учиб кетди. Абу Дабидан қайтувчи рейслар маҳаллий вақт билан соат 15:00 да амалга оширилади, йўловчилар Тошкентга соат 19:00 да етиб келишади (вақт ўзгариши мумкин). Янги рейслар учун чипталар Airsamarkand.com расмий сайтида, Ўзбекистон сайёҳлик агентликлари ва авиакассалари орқали сотилади. Чипталар нархи: бориш-келиш $350 ва бир томонга $160 дан (харид санасидаги курс бўйича).

Бу қиш мавсумида дам олиш учун Амирликларни танлаётганлар учун энг фойдали танлов – тўлиқ пакетли тур: парвоз, тавсия этилган 3-5 юлдузли меҳмонхоналар, трансферлар, овқатланиш, суғурта ва тўлиқ хотиржамлик. Турлар авиакомпаниянинг расмий ҳамкорлари - EasyBooking ва Kompas Tourда мавжуд.

Абу Даби – жаҳон даражасидаги объектлар ва оқ пляжларга эга замонавий мегаполис; оилавий дам олиш ва шопинг учун, айниқса қулай шаҳар. Парвознинг очилиши Ўзбекистон ва БАА ўртасида туризм ва ишбилармонлик саёҳатлари учун имкониятларни кенгайтиради.

“Абу Дабига биринчи рейс йўловчиларимизнинг ишончи ва ҳамкорларнинг мувофиқлаштирилган иши туфайли жуда муваффақиятли бўлди. EasyBooking, Kompas Tour ва Тошкент халқаро аэропортига самарали ҳамкорлик учун миннатдорчилик билдирамиз.

Жорий йилнинг ёзидан бошлаб Абу Дабидан Ўзбекистонга тўғридан-тўғри рейслар сони камайиб кетган эди. Биз қулай ва фойдали муқобил вариантни таклиф қилдик: саёҳат мақсадига қараб, тўлиқ пакетли турни танлаш ёки фақат чипта сотиб олиш мумкин.

Ишончим комилки, янги рейслар йўловчиларимизга манзур келади ва мамлакат туризм инфратузилмасини ривожлантиришга ҳисса қўшади”, – дейди Олег Иванов, “Air Samarkand” компаниясининг маркетинг ва PR бўйича директори.

2026 йилда авиакомпания яна бир нечта талаб юқори бўлган сайёҳлик йўналишларини очишни режалаштирмоқда.

Янги рейсни очишдан ташқари, авиакомпания яна бир хизматни йўлга қўйди: Абу Даби ва Жидда йўналишларидаги йўловчи рейсларининг багаж-юк бўлимларида юкларни ташиш – бу юкларни жўнатишнинг тез, қулай ва ишончли усулидир.