2030 йилгача ўрмон ресурсларидан самарали фойдаланиш бўйича мақсадли кўрсаткичлар тасдиқланди

Экология вазирлиги томонидан республиканинг яшиллик даражасини янада ошириш, ўрмонларни кўпайтириш борасида кўплаб ишлар амалга оширилмоқда.

Қайд этилишича, бу борадаги самарадорликни ошириш мақсадида вазирлик ҳузуридаги Ўрмон агентлиги фаолияти янада такомиллаштирилмоқда.

Маълумот учун, Ўзбекистон Республикаси Президентининг 2025 йил 30 майдаги «Яшил макон» умуммиллий лойиҳаси доирасида ҳамда ўрмонларни бошқариш тизимида ислоҳотларни изчил давом эттириш, яшил ҳудудларни кенгайтириш чора-тадбирлари тўғрисида»ги 90-сон Фармонига мувофиқ, Ўрмон хўжалиги агентлиги Ўзбекистон Республикаси Экология вазирлиги ҳузуридаги Ўрмон барпо этиш ва яшил ҳудудларни кўпайтириш, чўлланишга қарши курашиш агентлиги (Ўрмон агентлиги) этиб қайта ташкил этилди.

Фармонга кўра, Ўрмон агентлиги зиммасига қўшимча вазифалар юклатилди. Яъни «Яшил макон» умуммиллий лойиҳаси тадбирларини ташкил этиш ва ижросини таъминлаш, чўлланишга қарши курашиш ва ер деградациясининг олдини олиш агентлик фаолиятининг устувор вазифалари қаторига киритилди.

Таъкидлаш жоизки, Агентлик томонидан 2025 йилда яшиллик даражасини ошириш борасида бир қатор ишлар амалга оширилди. Хусусан, 130 минг гектар ҳудудда ўрмон барпо этилди (йил охиригача яна 123 минг гектарда ўрмонлар яратилади). Барча ўрмон хўжаликларида 123 млн дона кўчат етиштирилди, шундан 30 млн донаси аҳоли ва ташкилотларга берилди. Шунингдек, 2,7 минг гектарда ҳимоя ўрмонзорлари барпо қилинди, 2,7 минг гектар деградацияга учраган ерлар тикланди (бу рақам йил охиригача 7 мингга етказилади), 5,9 минг гектарда доривор ўсимликлар плантациялари, 10 минг тонна маҳсулот етиштирилди, «ин витро» лабораториялари фаолияти йўлга қўйилди ва 20 минг гектар ер кам таъминланган оилаларга ижарага берилди.

19–21 июнь кунлари ўтказилган «Эcо Эхпо Cэнтрал Ациа 2025» халқаро экологик технологиялар кўргазмасида Ўрмон агентлиги қатор халқаро компаниялар билан ҳамкорлик келишувларини имзолади. Мазкур келишувлар чўл минтақаларда яшил ҳудудлар яратиш, қум бўронларига қарши технологияларни қўллаш, рақамли ўрмон бошқаруви платформалари ҳамда 150 минг гектарда ўрмон массивлари яратишни қамраб олади.

Маълумот учун, "Green University” ҳузурида Хитой Фанлар академияси Шинжон экология ва география институти филиали ташкил этилди. У ерда сувни тежовчи технологиялар асосида аҳоли пунктларини кўкаламзорлаш, чўл ва яйлов экотизимларини тиклаш, шўр ва қуруқ ҳудудларда галлофит ва ксерофит ўсимликларни етиштиришга қаратилган лабораториялар фаолият юритади.

Айни дамда хорижлик ҳамкорлар билан бирга 5 туманда (Арнасой, Нукус, Қоракўл, Муборак, Кармони) галлофит боғлар ташкил этилмоқда. Шунингдек, Шинжон институти мутахассислари томонидан Қашқадарё ва Сурхондарёда яйловларни тиклаш бўйича тавсиялар ишлаб чиқилмоқда. Қолаверса, 142 млн долларлик кредит ва 11 млн долларлик грант маблағлари ҳисобига ўрмон ландшафтларини тиклаш лойиҳаси амалга оширилмоқда. 2025 йилда 20 млн доллар ўзлаштирилди.

«Яшил макон» ташаббусини янги ёндашувлар асосида жадаллаштириш, доривор ўсимликлар хом-ашёси ва қайта ишлаш тизимини ривожлантиришга қаратилган Президент фармонлари лойиҳалари ишлаб чиқилди. Шу билан бирга, «Ўзбеккосмос» ва бошқа ҳамкор ташкилотлар билан ўрмон фонди ерларини инвентаризация қилиш бўйича мониторинг амалга оширилмоқда. Мониторинг натижаларига кўра, 1033 та ноқонуний ҳолат прокуратурага юборилди.

Маълумот учун, 2025 йил 30 майдаги «Ўрмон ва яшил ҳудудларни кўпайтириш, чўлланишга қарши курашиш агентлиги фаолиятини ташкил этиш чора-тадбирлари тўғрисида»ги 197-сонли Президент қарорига асосланиб, 2030 йилгача ўрмон фонди ресурсларидан самарали фойдаланиш бўйича мақсадли кўрсаткичлар тасдиқланди. Унга кўра, 1,5 миллион гектарда ўрмонлар барпо этиш, 919 миллион дона кўчат ва ниҳол етиштириш, 47,7 минг гектар ерни ўзлаштириш ва 18,7 минг гектар майдонда ҳимоя ўрмонзорлари ташкил этиш кўзда тутилган. 2030 йилгача барча мақсадли кўрсаткичлар тўлиқ бажариш мақсад қилинган.