“Медиа ҳафталик”: мамлакатимизда йилнинг энг йирик медиа лойиҳаси старт олмоқда

Глобал ахборот маконидаги шиддатли ўзгаришлар, ижтимоий тармоқлар ва сунъий интеллектнинг ривожланиши, фейк хабарлар оқими медиа соҳаси вакилларидан мутлақо янгича ёндашувларни талаб этмоқда. Шу мақсадда республикамизда йилнинг энг йирик ва муҳим таълимий-амалий лойиҳаси — журналистлар, блогерлар ва матбуот котибларини ягона платформада бирлаштирувчи “Медиа ҳафталик” ўз ишини бошлади.

Контент маркази томонидан ҳамкор ташкилотлар билан биргаликда йўлга қўйилаётган мазкур лойиҳа бутун республикамиздан қарийб 12,5 минг иштирокчини қамраб олади. Жорий йилнинг 30 мартидан 26 июнига қадар ҳар бир ҳудудда 5 кунлик интенсив ўқув-семинарлар ва маҳорат дарслари ўтказилиши режалаштирилган.

Дастурда назария ва амалиёт бирлашади: асосий урғу ҳақиқий тажриба ортиришга қаратилган. Мамлакатимиз энг етакчи медиа-экспертлари, муҳаррир ва продюсерлари иштирокида контент яратиш, фактчекинг, рақамли гигиена, SMM ва стратегик коммуникациялар каби муҳим мавзулар бўйича тренинглар олиб борилади.

Машғулотлар тележурналистлар, босма нашрлар, блогерлар ва давлат идоралари матбуот котиблари учун алоҳида йўналишларда ўтказилади. Билимларини оширган иштирокчиларга махсус сертификатлар топширилади.

Ўзбекистон бўйлаб ҳаракатланувчи мазкур медиа-эстафетанинг илк босқичи 30 март куни Қорақалпоғистон Республикасида бошланади. Дарслар давомида иштирокчилар реал кейслар асосида ишлаш, хатоларни таҳлил қилиш, янгича ёндашувларни шакллантириш имконига эга бўлади. Спикерлар ўз тажрибалари билан ўртоқлашиб, замонавий медиа ривожининг устувор йўналишлари бўйича тавсиялар беради.

Ҳафталик якунида ҳудуддаги соҳа вакилларини қамраб олувчи йирик Медиа форум ташкил этилади.

Лойиҳада иштирок этиш истагида бўлган номзодлар Ёшлар ишлари агентлигининг ҳудудий бошқарма ва бўлимларига мурожаат қилишлари мумкин.

Медиа ҳафталик қуйидаги саналарда ҳудудлар кесимида ташкил этилади:

• 30 март – 3 апрель: Қорақалпоғистон Республикаси;
• 6 апрель – 10 апрель: Хоразм вилояти;
• 13 апрель – 17 апрель: Сурхондарё вилояти;
• 20 апрель – 24 апрель: Қашқадарё вилояти;
• 27 апрель – 1 май: Самарқанд вилояти;
• 4 май – 8 май: Навоий вилояти;
• 11 май – 15 май: Бухоро вилояти;
• 18 май – 22 май: Фарғона вилояти;
• 25 май – 29 май: Наманган вилояти;
• 1 июнь – 5 июнь: Андижон вилояти;
• 8 июнь – 12 июнь: Жиззах вилояти;
• 15 июнь – 19 июнь: Сирдарё вилояти;
• 22 июнь – 26 июнь: Тошкент вилояти ва Тошкент шаҳри.