O‘kinmayman, chunki men g‘olibman! (Ustozning so‘zlaridan ruhlanib)
- To‘ralarning mashinani “shapka” bilan sotishlariyu, buni ustomonlik, ishbilarmonlik deb hisoblashlari, nafslarining xohishi uchun ming bir yo‘lni izlab topishlaridan zulm ko‘rib, ulov sotib ololmayotgan bo‘lsam,o‘kinmayman. Chunki, men harom bilan yetish mumkin bo‘lgan maqsadimga pokiza yo‘l bilan topgan pulimni vosita qilmayapman, nafsimdan g‘olibman!
- O‘qishga kirish uchun tinmay mehnan qilib, intilishimga qaramay, yonimdagilarning pora evaziga mendan o‘zib ketishlari, aqlbovar qilmas darajada yuqori ball to‘plab oddiy abiturentni dog‘da qoldirishlarini ko‘rsam, o‘kinmayman! Chunki siz haromdan hazar qildim, nafsimdan g‘olibman!
- Opa-singillarim, ayolim hijobi sabab ko‘chaga hadiksirab chiqayotgan bo‘lsa, soqol qo‘yganim uchun “mutaassiblar” safiga qo‘shib qo‘yilsam, dindorligim uchun qo‘llarini bigiz qilib menga ta’na qilishsa, o‘kinmayman. Balki men hidoyat qo‘shini safidaman, nafsimdan g‘olibman!
- Hayotim davomida kimlarningdir bosimi ostida yashasam, menga chap ko‘z bilan qarashsa, doimo yomonlik, xavf xatar keltirib chiqaruvchi unsur sifatida qarashsa, o‘kinmayman. Men haq tomonman, nafsimdan g‘olibman!
“Ammo, kimki Parvardigorining (huzurida) turishi (va hisobot berishi)dan qo‘rqqan va nafsini havolanishdan qaytargan bo‘lsa bas, faqat jannatgina (unga) makon bo‘lur!” ("Noziat" surasi, 40-41 oyat)
Abdulloh MUHAMMAD
Manba: azon.uz
