Turkiya AQShga Rossiya qurollari bilan tahdid qildi
Agar AQSh F-35dan keyin F-16 sotuvini muzlatib qo‘ysa, u holda Turkiya Rossiyadan Su-35 va Su-57 qiruvchi samolyotlarini sotib oladi. Bu haqda Turkiya mudofaa sanoati boshqarmasi boshlig‘i Ismoil Demir ma’lum qildi, deb xabar beradi Kanal 7 telekanali.
“Turkiya alternativsiz qolmaydi. Agar kerak bo‘lsa, Su-35 va Su-57 mavzusi istalgan vaqtda ochilishi mumkin. Bizning sanoatimiz xavfsizligimizni ta’minlash uchun hamma narsani qilyapti, agar qo‘shimcha narsa kerak bo‘lsa, biz har doim chiqish yo‘lini topa olamiz”, - dedi Demir.
Eslatib o‘tamiz, avvalroq Rossiya, agar Anqara ularni sotib olishga qaror qilsa, Moskva Turkiya tomoni bilan Su-35 va Su-57 qiruvchi samolyotlari bo‘yicha muzokaralar olib borishga tayyorligini ta’kidlagandi.
Eslatib o‘tamiz, yaqinda Qo‘shma Shtatlar Turkiyaga Rossiyaning S-400 havo mudofaa tizimlarini Anqara tomonidan sotib olinishi munosabati bilan eng yangi F-35 qiruvchi samolyotlarini ishlab chiqarish dasturidan chiqarilishi to‘g‘risida xabarnoma yubordi.
