Toshkentdagi maktabda o‘qituvchi va o‘quvchi o‘rtasida janjal sodir bo‘ldi

Ijtimoiy tarmoq sahifalarida «O‘quvchi o‘z o‘qituvchisiga qo‘l ko‘tarmoqda, boshqa biri maymunga o‘xshab o‘ynayapti, butun sinf o‘qituvchini kalaka qilyapti» mazmunidagi videoxabarlar tarqaldi.

Yuqoridagi holat yuzasidan Toshkent shahar maktabgacha va maktab ta’limi boshqarmasi quyidagilarni ma’lum qiladi. Jumladan, Chilonzor tumanidagi 103-sonli umumta’lim maktabida o‘qituvchi va o‘quvchi o‘rtasida yuz bergan hodisa Maktabgacha va maktab ta’limi vazirligi, Mahallalar uyushmasi Toshkent shahar boshqarmasi, Chilonzor tumani hokimligi, shahar maktabgacha va maktab ta’limi boshqarmasi vakillari va boshqa mas’ullar tomonidan o‘rganildi.

O‘rganishlar jarayonida maktab ma’muriyati, o‘quvchilar va ota-onalar bilan muloqot o‘tkazildi. Ma’lum bo‘lishicha, maktabning 6-«A» sinf o‘quvchilari matematika darsida o‘qituvchi YU.P. ning gaplariga quloq solmagan va tartib buzishgan. O‘z navbatida o‘qituvchi ham jahlini jilovlay olmasdan bolani majburlab sinfdan chiqarib yuborgan. O‘quvchi sinfdan chiqmaslik uchun o‘qituvchiga qarshilik ko‘rsatgan.

Yuqoridagi holat to‘liq Maktabgacha va maktab ta’limi vazirligi nazoratiga olingan. Maktabda yuz bergan bu voqea yuzasidan ota-onalar yig‘ilishi chaqirildi va ularning xohishiga ko‘ra matematika o‘qituvchisi YU.P. mazkur sinf o‘quvchilariga dars o‘tishdan chetlashtirildi. Tartib buzgan bolalar va ularning ota-onasiga chora ko‘rish masalasi tuman hokimligi Bolalar masalalari bo‘yicha komissiya yig‘ilishida ko‘rib chiqiladigan bo‘ldi.

Maktabda bo‘lgan mazkur holatlar yuzasidan murojaat qilgan barcha OAV vakillariga ham izohlar va ma’lumotlar yetkazildi.