Quyosh energiyasidan suyuq yonilg‘i olindi

Shvesiya va AQSh olimlari quyosh energiyasini to‘plovchi suyuqlikni yaratishdi. Ta’kidlanishicha, yangi texnologiya quyosh batareyalari bozorida inqilob yasashi mumkin.

Yangi yonilg‘i negizida yotuvchi molekulani yaratish jarayoni bir necha yildan beri davom etadi, biroq olimlar oxirgi vaqtda uglerod, vodorod va azotdan o‘ziga xos molekulani yaratishda ancha taraqqiy qildilar.

“Quyosh nuri atomlar o‘rtasidagi bog‘lanishlarni o‘zgartirishga majbur qiladi, natijada molekula quyosh energiyasini 20 yil davomida saqlay oladigan izomerga aylanadi”, deb aytishgan Massachusets texnologiya instituti xodimlari.

Yangi texnologiyaga asoslanadigan, quyosh energiyasini olish va saqlash uchun mo‘ljallangan yangi tizimlar quyosh energiyasini maxsus suyuqlikda to‘playdi, so‘ngra zarurat bo‘lganda energiyani issiqlik ko‘rinishida bera oladi.

Shaffof trubkalardagi suyuqlik quyosh nuri yordamida qiziydi va uning tarkibidagi norbornadiyen molekulalari issiqlik saqlovchi izomer – kvadrisiklanga aylanadi.

“Olingan suyuqlik xona haroratida saqlanadi. Agar undan energiya olinmoqchi bo‘lsa, suyuqlik katalizatorga joylashtiriladi va molekulalar issiqlik ajratgancha dastlabki shakliga qaytadi”, deb tushuntirganlar olimlar.

Manba: kun.uz