Polshada qamoqda bo‘lgan o‘zbekistonlik yurtga qaytarildi

O‘zbekistonning Polshadagi elchixonasi xorijda qiyin ahvolga tushib qolgan vatandoshlarni himoya qilish va ularga amaliy yordam ko‘rsatish ishlarini davom ettirmoqda.

Ma’lum qilinishicha, elchixona diplomatlari, “Artur Grabovski” advokatlik byurosi hamda Polsha Chegara xizmati bilan o‘tkazilgan muzokaralar natijasida namanganlik fuqaro I.M. muddatidan avval shartli ravishda ozod qilindi.

U Polshada o‘lim bilan yakunlangan yo‘l-transport hodisasini sodir etgani uchun ushbu mamlakat Jinoyat kodeksining tegishli moddasiga muvofiq sudlanib, 3 yil muddatga ozodlikdan mahrum etilgan edi.

Elchixona tomonidan ko‘rilgan tezkor chora-tadbirlar hamda Yevropa Ittifoqining Chegara va sohil xavfsizligi agentligi (Frontex) ko‘magida fuqaro uchun «Varshava–Toshkent» yo‘nalishi bo‘yicha aviachipta xarid qilindi.

Barcha zarur rasmiylashtiruv ishlari yakunlangach, O‘zbekiston fuqarosining Polshadan chiqib ketishi tashkil etildi va u sog‘-salomat vatanga qaytarildi.