Hindiston AQSh bilan tarif muddatidan oldin kelishuvga umid qilmoqda

Hindiston tashqi ishlar vaziri Subramaniyam Jayshankar AQSh bilan savdo kelishuviga 9 iyulgacha erishishga umid qilinayotganini ma’lum qildi. Unga ko‘ra, ikki davlat rahbarlari bozorlarga kirish imkoniyatini kengaytirishga kelishib olgan.

Fransiyadagi «Le Figaro» nashriga bergan intervyusida Jayshankar AQSh prezidenti Donald Trampning 2 apreldagi «Ozodlik kuni» tariflari e’lon qilinishi oldidanyoq muzokaralar boshlanganini bildirdi. Tariflar Hindiston uchun 27 foizgacha bo‘lgan import to‘lovlarini nazarda tutgan edi.

Jayshankar: «Biz 9 iyulgacha, ya’ni 90 kunlik tanaffus yakuniga qadar kelishuvga erishishga umid qilamiz», – dedi. U so‘zlariga ko‘ra, kelishuv har ikki davlat manfaati uchun muvozanatli va o‘zaro foyda keltiradigan bo‘lishi lozim.

Shuningdek, Dehlida AQSh va Hindiston rasmiylari o‘rtasida yopiq eshiklar ortida savdo muzokaralari o‘tkazildi.
Ayni vaqtda Hindiston AQSh tovarlariga bojlarni kamaytirgan, jumladan, viski va motosikllar uchun tariflar pasaytirilgan. Lekin AQSh tomoni 45 mlrd dollarlik savdo taqchilligini qisqartirishga intilmoqda.

Tramp va Modi o‘zaro savdo hajmini 500 mlrd dollargacha yetkazishni maqsad qilgan, biroq Hindiston hukumatining ayrim himoya qilinishi zarur bo‘lgan sohalar – xususan, qishloq xo‘jaligi borasida imtiyoz berish ehtimoli kam.

Oxirgi haftalarda Tramp ma’muriyati savdo sheriklaridan eng yaxshi takliflarini taqdim etishni so‘ragan. AQSh savdo vaziri Xovard Lutnik esa yaqin kelajakda kelishuvga erishilishiga «ishonch bildirgan».