Зулфиқор Мусоқов: Президентга юборган мурожаатимнинг бирор сўзидан қайтмайман! Далилларим бор

Ўзимни таништиришга рухсат этинг – Зулфиқор Мусоқов, Ўзбекистон Республикаси фуқароси, кинорежиссёр, "Ўзбекфильм" киностудиясининг оддий ходими. 
Кинорежиссёр Зулфиқор Мусоқов
Менда иккита давлатнинг фуқаролиги йўқ, бутун умр шу ерда яшаяпман, фарзандларим чет элда ўқишмайди ва чет элда уйларим ҳам йўқ. Ҳеч қачон шахсий муаммоларим ҳақида оғиз очмайман – уларни ўзим қонуний равишда ҳал қиламан. Мен ҳеч қачон ҳеч қандай бошқарув лавозимларини эгалламаганман ва эгаллашни хоҳламайман – бу менга керак эмас. Ҳеч қачон жамоавий хатларга имзо чекмайман... Керак бўлса, фақат ўз номимдан гапираман. Ва айтган гапларимдан асло тонмайман.
Ҳаммаси 109 кишининг (улардан баъзилари қўйган имзоларини рад этган бўлсалар-да – бу энди уларнинг виждонига ҳавола), яъни – "Ўзбекфильм" ДУК студиясининг деярли бутун ходимлари ва "Ўзбекмультфильм" ДУК, "Ўзбеккино" агентлигининг ижодий ишлар бўйича директорининг биринчи ўринбосари Ш. Т. Ризаев, молия масалалари бўйича Директор ўринбосари Н. Д. Маҳмудов, Ўзбекистон Киноарбоблари ижодий уюшмаси раиси М. Матчанов, ўнга яқин киноижодкорлар фактлар асосида, ҳеч кимни шахсан ҳақорат қилмаган ҳолда, Бош вазирга аниқ(конкрет) ёзилган хати(мурожаати)дан бошланди. 
Бу мактубга муносабатимни сўраган Агентлик директорига биринчи бўлиб берган маслаҳатим шундай эди: - Бош вазирга мурожаат қилганларнинг ҳаммасини йиғиб, муаммолари ҳақида ҳар бири билан алоҳида гаплашинг, уларга қулоқ солинг. 
Бу мактубни имзолаганларга Facebookда икки марта очиқдан-очиқ карантин тугашини кутишларини, муаммолар борлигини, 2019 йилни ноябрь ойидан бери гапиравериб, тилимга чечак чиқиб кетганини ва тоқатим тоқ бўлганидан бу масала бўйича Президентга шахсан ўз номимдан хат билан мурожаат қилишимни айтганман. Ва мен ўз гапимда турдим: 29 август куни мамлакатимнинг фуқароси сифатида Президент Халқ қабулхонасига мурожаатимни олиб бориб топширдим, бир вақтнинг ўзида ушбу мурожаатни Президентнинг виртуал қабулхонасига жўнатдим.

15 сентябрь куни эрталаб Бухородан, янги фильмим эпизодларини суратга олишдан қайтдим ва соат 11.30 да почтачи менга "Ўзбеккино" иш бошқарувчиси Э. Юлдашев томонидан имзоланган мактубни олиб келди, унда мени 15 сентябрь куни соат 15.00 да "Ўзбеккино" жамоатчилик Кенгаши Мажлисига Президентга қилган мурожаатим юзасидан таклиф қилишган эди. Мактубда шундай ёзув бор эди: агар йиғилишга келмасангиз, сизнинг масалангиз ёпилади. Лекин буни қарангки, мен келдим. Кўплаб кинематографчилар, кўплаб халқаро кинофестиваллар ғолиблари ҳам менга далда бўлиб келишди, чунки бу мурожаат, аввало, уларнинг ҳаётий муаммолари ҳақида эди. Мени Э. Юлдашев ва ўзини Жамоатчилик Кенгаши раисининг ўринбосари деб таништирган С. В. Иргашев кутиб олишди. Э. Юлдашев Жамоатчилик Кенгашининг йиғилиши кеча, 14 сентябр куни бўлиб ўтганини маълум қилди... Буни қандай тушуниш мумкин? Мен Элдор Йўлдошевга хат 2020 йилнинг 9 сентябрида менинг манзилимга жўнатилганини тўғридан-тўғри айтдим, наҳотки оддий қўнғироқ қилишнинг иложи бўлмаган бўлса?! Э. Юлдашев бу хато учун узр сўради, гарчи бунинг номи оддийроқ тилда айтганда – ғаразли, режаланган аҳлоқсизлик деб аталади.

С.В. Иргашев биринчи суҳбатда менга ягона ва мени ҳақорат этган саволни берди: Россия Кино Академиясининг НИКА мукофотига олти карра номзод бўлганингиз ростми? 
Мен нима, ўзимга ўзим қўшимча унвонлар ва мукофотларни тайинлаб, ёздириб оладиган ақли пастга ўхшайманми? С. В. Иргашев жавоб берди: ўзбек киноси ҳақида ҳеч нарса билмайман, ҳамкасбларингиз шундай дейишяпти.
Менинг: бунга ким шубҳа қиляпти, деган саволимга ҳеч қандай жавоб ололмадим…

17 сентябрь куни ўзини яна Жамоатчилик Кенгаши раисининг муовини деб таништирган С.В. Иргашев мени 21 сентябрь куни Кенгаш йиғинига яна бир бор расман таклиф қилди. Мен келдим. Ёш ва қари киноижодкорларим ҳам учрашув хонасига киришди. "Ўзбеккино" Жамоатчилик Кенгаши раиси Х. Хасанов ҳамкасбларим чиқишини талаб қилди. Йигитлар бу масала барча кинематографчиларга тегишли эканлигини айтишди, бироқ Жамоатчилик Кенгаши аъзолари уларни залдан чиқаришни талаб қилиб бақира бошладилар. Бу ерда нима, ҳарбий сирлар муҳокама қилинадими? Охир-оқибат, мен бизнинг ишимизга бунинг зарари бўлмасин, деб ҳамкасбларимдан чиқиб туришларини сўрадим. Буларнинг барчаси "Ўзбеккино" томонидан тасвирга олинган. 

"ЎЗБЕККИНО" РАҲБАРИЯТИНИ ФОЙДАСИНИ КЎЗЛАБ, МОНТАЖ ҚИЛИНАДИГАН УШБУ ВИДЕОРОЛИК "ЎЗБЕККИНО" ДИРЕКТОРИНИНГ ЎЗИГА ҚАРАШЛИ КАНАЛЛАРИДА ЭФИРГА УЗАТИЛМАСЛИГИГА КАФОЛАТ ЙЎҚ. АГАР ШУНДАЙ БЎЛСА, ИШОНМАНГ – БУ НОТЎҒРИ МАЪЛУМОТ.

Мен ҳуқуқшунос эмасман, лекин оддий фуқаро сифатида шуни биламанки, судда ҳам судланувчи судьяларга қарши чиқиш ҳуқуқига эга. Бу ерда эса суд эмас ва мен, Худога шукурки, судланувчи эмасман. Бундан ташқари, бу – "Фуқаролар ва юридик шахсларни мурожаати тўғрисидаги қонун" нинг 24-моддасининг ва Кенгашнинг ўз низоми 20-моддаси, 3-июл, 165а-сонли буйруғининг бузилишидир. 

Мунозара ҳужумкор шаклда нохолис хақоратомуз сўроққа айланди.
Бу ерда умуман кулгули саҳна бошланди: С. В. Иргашев Жамоатчилик Кенгаши раисининг ўринбосари эмас,балки кўнгилли адвокат экан... Қандай қилиб ёши катта, кекса одам мени очиқдан-очиқ чалғитишга уриниши мумкин?

Жамоатчилик Кенгаши таркиби ҳақида ўз фикримни ёзма равишда берган эдим. Ҳозир кенгаш аъзоларидан бирининг жиноий ўтмиши борлигини, унча узоқ бўлмаган жойларда 6 йил жазо ўтаганини билиб қолдим. Уларга мен ишонишим керакми? Мен Жамоатчилик Кенгашига мамлакатимиз кино соҳасига ўз ҳиссасини қўшган жуда муносиб инсонларни таклиф қилдим: Қорақалпоғистон ва Ўзбекистон халқ артисти Ёдгор Саъдиев, Ўзбекистон халқ артисти Дилором Каримова, Ҳайрулла Саъдиев, Баҳодир Юлдашев; Ўзбекистонда хизмат кўрсатган артистлар Рустам, Саъдуллаев, Раъно Шодиева, Фарҳод Абдуллаев; Ўзбекистонда хизмат кўрсатган санъат арбоблари Абдураҳим Исмоилов, Баҳодир Жалолов, Акмал Нур; кўплаб халқаро кинофестиваллар совриндорлари, режиссёрлар Жаҳонгир Қосимов, Аюб Шаҳобиддинов, Ёлқин Тўйчиев, Абдуҳалил Мингноров, Нозим Тўлахўжаев, Шуҳрат Маҳмудов, Қаҳрамон Хасанов, актёрлар Бобур Йўлдошев, Феруза Саидовалар. 

Ёки Кенгаш аъзолари директор томонидан шахсан унга садоқат даражаси асосида танланганмикин?!

Кенгаш аъзоларидан бирининг жавоби беихтиёр мени ҳайратга солди: нега сиз юқорида номлари келтирилган одамларни муносиб, деб ўйлайсиз?

Жамоатчилик Кенгашининг иккинчи аъзоси:
Кино бу бизнес, деди.

Ия? Уларга ишонайми ёки Президентимизни “Санъат ва бизнес ҳеч қачон бирга бўлмайди”,- деган гапларигами?

Саволларга берган жавобларим сўнгида тўғридан-тўғри ва очиқ айтдим:

Кенгаш раиси Х. Хасановга қандай ишонч бўлиши мумкин? Айнан шу киши бундан икки йил олдин Бадиий кенгашнинг барча аъзолари гувоҳлигида, оммавий тарзда: – "фашистлар уруш даврида унчалик ҳам ваҳшийлик қилмаганлар", - дея даҳшатли ва ҳақоратли гапни айтган одамга ишонишим керакми? Мен ишонмайман. Сизчи, ишонасизми?Охирги гапим: Президентга юборган мурожаатимнинг бирор сўзидан қайтмайман  ва исталган жойда айта оламан. Ҳаммасига далилларим бор! 

Ўзбекистон Республикаси санъат арбоби, "Меҳнат шуҳрати" ордени соҳиби, кинорежиссёр Зулфиқор Мусоқов