Сенатнинг 21-ялпи мажлисида моддий маданий мерос объектларини асраш, реставрация қилиш жараёни, бунда кадрлар салоҳияти бўйича масалалар кўтарилди. Маданият вазири Бахтиёр Сайфуллаев шу мавзуда сенаторлар томонидан берилган саволларга жавоб берди.

“Маданий мерос объектларимизни реставрация қилишда кадрлар масаласи бизнинг энг оғриқли нуқтамиз ҳисобланади. Ҳозир 7500 га яқин маданий объектларнинг 259 тасининг буткул йўқотилган, тиклаб бўлмайди. Уларни реставрация қилишда бизда етарли кадрлар йўқ. Бу ишлар кўп йиллардан бери мардикорлар томонидан қилинади. Кунимиз уларга қолиб кетди. Реставрация – бу илм, алоҳида малака талаб қилади. 1984 йилгача республикада реставрация институтида бўлган. Айрим сабабларга кўра шу таълим муассасасини йўқ қилдик. Хорижликлар менга реставрация институти нима учун йўқ, деб савол беришади. Қандай жавоб беришни билмайман. Камолиддин Беҳзод номидаги Миллий рассомлик ва дизайн институти ва Тошкент архитектура-қурилиш институтида реставрация бўйича шу ўқув йилида кафедра очиш бўйича Олий таълим вазирлигига таклиф киритганмиз.”

Вазирнинг қўшимча қилишича, Бухоро давлат университети реставрация билан шуғулланувчи муҳандислар йўналиши очилди. Реставрация ишлари лицензия олмасдан амалга оширилди. Шунинг натижасида маданий мерос объектлари қаровсиз қолдирилди.