Туркманистон парламенти сайловларида 3,5 миллионга яқин сайловчи қатнашади

Туркманистон парламент сайловида иштирок этиш учун рўйхатга олинган сайловчилар сони тахминан 3,5 миллион нафарни ташкил қилди, деб хабар берди мамлакат Сайлов ва референдумлар марказий комиссияси.

“Рўйхатга олинган уч миллион 496 минг 475 нафар сайловчидан 13 минг 78 сайловчи хорижий мамлакатларда овоз беради”, дейилади хабарда.

Қайд этилишича, айни пайтда икки минг 644 та сайлов участкаси, шунингдек, Туркманистоннинг хориждаги дипломатик ваколатхоналари ва консуллик муассасалари ҳузурида 41 та сайлов участкаси ташкил этилган.

Сайловларни икки минг 855 нафар миллий кузатувчи ва БМТ, МДҲ, Туркий Давлатлар Ташкилоти, Шанхай Ҳамкорлик Ташкилоти, Европа Хавфсизлик ва Ҳамкорлик Ташкилотининг Демократик институтлар ва инсон ҳуқуқлари бўйича бюроси каби халқаро ташкилотлар вакиллари кузатиб боради.

Хорижий давлатлар оммавий ахборот воситалари ҳам рўйхатдан ўтган.

“Турксвязь” агентлиги 240 та сайлов участкасида видеокамералар ўрнатмоқда.

Сайлов 26 март куни соат 07.00да бошланиб, соат 19.00гача давом этади. Овоз бериш жараёни Сайлов ва референдумлар марказий комиссиясининг сайтида тўғридан-тўғри намойиш этиб борилади.