«Тунги босқинчилар»га чиқарилган суд ҳукми ўзгаришсиз қолдирилди

Қорақалпоғистон Республикаси судининг жиноят ишлари бўйича судлов ҳайъати, судланувчилар Ш.А., О.Б., Н.Б., ва А.Ж.ларга нисбатан чиқарилган жиноят ишлари бўйича Нукус шаҳар судининг 2021 йил 21 сентябрдаги ҳукми устидан судланувчи Ш.А. О.Б. ва уларнинг ҳимоячилари томонидан берилган шикоятларига асосан, жиноят ишининг судланувчилар Ш.А. ва О.Б.ларга оид қисмини очиқ суд мажлисида, апелляция тартибида кўриб чиқди.

Суднинг ҳукми билан 1996 йили Самарқанд вилояти Ургут туманида туғилган Ш.А., ушбу туманда 1999 йил туғилган О.Б.лар Ўзбекистон Республикаси Жиноят кодекси 164-моддаси 3-қисмининг “в” банди билан ЖКнинг 57-моддасини қўлланилган ҳолда 6 (олти) йил муддатга озодликдан маҳрум қилиш жазоси тайинланиб, тайинланган жазони умумий тартибли колонияда ўташ белгиланган, жазони ўташ муддати 2021 йил 20 мартдан бошлаб ҳисобланган ва қамоққа олиш тарзидаги эҳтиёт чораси ўзгаришсиз қолдирилган. Жиноят иши бўйича етказилган 58.523.560 сўм моддий зарар тўлиқ қоплангани ҳисобга олинган.

Суд ҳукмига кўра, судланувчи Ш.А. жиноий йўл билан пул топиш илинжида, танишлари Ш.Ш., Б.А., ва Н.Б. билан олдиндан тил бириктириб, бир гуруҳга бирлашиб, Нукус шаҳар 22 кичик туманида яшовчи И.К.нинг хонадонидан пул маблағи ва мол мулкини босқинчилик йўли билан ўзлаштириш ҳақидаги ўзаро жиноий режа тузиб, жиноий режаларини амалга ошириш мақсадида гуруҳ аъзолари билан ўзаро вазифалар тақсимлаган.

Шу тариқа, 2021 йил 7 март куни соат 21:00 да Ш.А.нинг жиноий шериги Н.Б. фуқаро М.К.ни байрам муносабати билан зиёфат қилиш баҳонасида Нукус шаҳрида жойлашган “NЕО” ресторанига таклиф қилади. Улар ресторанда бирга овқатланиб, спиртли ичимликлар истеъмол қилиб ўтирганида соат 00:30 ларда М.К.нинг танишлари У.Ю. ва Қ.А.лар кутилмаганда уларнинг режасига зид равишда Н.Б., А.Ж. ва М.К.лар ўтирган столга келиб ўтиргандан сўнг орадан озгина вақт ўтиб, К.А. билан А.Ж.лар ўртасида ўзаро келишмовчилик келиб чиқади. Шу тариқа М.К. танишлари К.А. ва У.Ю.лар билан бирга ресторандан чиқиб кетганидан сўнг Н.Б. жиноий шеригига қўнғироқ қилиб, М.К.нинг ресторандан кетиб қолганлигини, режа ўхшамаганлиги айтганида, унга М.К.нинг қаерга кетганлигини билиш лозимлигини, режа амалга оширилмагунга қадар бир амаллаб уни уйига юбормасдан ушлаб туриш лозимлигини айтган.

Сўнг, Н.Б. М.К.нинг қаердалигини билиш мақсадида унга қўнғироқ қилганига қарамасдан, унинг қўнғироқларига жавоб бермаганидан кейин жиноий гуруҳ аъзоларининг ҳаммаси “NЕО” ресторани олдига йиғилиб, Ш.Ш. бошқарувидаги фуқаро Д.Ш.нинг номидаги давлат рақам белгиси 01 O 219 GB бўлган COBALT русумли автомашинада М.К. қайтиб бормасидан аввал унинг уйига бориб, моддий қимматликларни олиб чиқиш кераклигини келишиб олади. Соат 03:30 ларда М.К.нинг уйи томонга бориб, Ш.Ш. ўзининг олдиндан тайёрлаб қўйилган ниқоб (маска) ларни ёнидаги шериклари О.Б. ва Ш.А.ларга бериб, узлари Нукус шаҳар “Бройллер” блок пости томонида кутиб туришини айтиб, у ердан кетган.

Ш.Ашуров ва О.Б,лар спиртли ичимлик ичган, маст ҳолатда қора ва қизил рангли матоли бош кийимдан ясалган ниқобларни юзларига тақиб, эшикни тақиллатишади ва М.К.нинг 2009 йил туғилган вояга етмаган қизи ва 2013 йил туғилган вояга етмаган ўғлига “онанг пицца бериб юборди” деб айтиб, уларни алдаб, уйнинг кириш эшигини очдиришга эришиб, уйга ғайриқонуний равишда кирган. Юзига ниқоб таққан шахсларни кўрган қизи қўрқиб кетиб, бақириб юборганида О.Б. вояга етмаган қизнинг ҳаёти учун хавфли бўлган усулда қўллари билан унинг оғзини босиб, агар яна бақирса ўлдиришини айтади., Ш.А. билан хонадон ичкарисига кириб, М.К.га тегишли бир дона баҳоси 500000 сўм бўлган “Samsung J2” русумли ва бир дона баҳоси 300000 сўм бўлган “Samsung C3 mini” русумли телефон аппаратларини, бир жуфт қиймати 1000 АҚШ доллар бўлган бриллиант қошли тилла зирагини ҳамда бир дона қиймати 500 АҚШ доллар бўлган бриллиант қошли узугини жами 2500 АҚШ доллари (2021 йил 8 март ҳолатига кўра 1 АҚШ долларининг сўмдаги қиймати 10517,12 сўмга тенг бўлиб, 2.500 х 10517,12 = 26,292,800 сўм) ашёларини босқинчилик йўли билан талон-тарож қилиб, Ш.Шароповнинг бошқарувидаги давлат рақам белгиси 01O 219GB бўлган COBALT русумли автомашинада воқеа жойидан яширинган.

Юқоридагиларга асосан, судланувчилар Ш.А. ва О.Б. ўзларининг жиноий ҳаракатлари билан Ўзбекистон Республикаси ЖКнинг 164-моддаси 3-қисмининг “в” бандида кўрсатилган жиноятни қастдан содир қилишган.

Ўзбекистон Республикаси Олий суди Пленумининг 2006 йил 3 февралдаги “Судлар томонидан жиноят учун жазо тайинлаш амалиёти тўғрисида”ги 1-сонли қарорининг 1-бандида “Судларнинг эътибори, жиноят учун жазо чорасини тайинлашда қонунийлик, инсонпарварлик, одиллик ва жавобгарчиликнинг муҳаррарлиги тамоилларига қатъий амал қилишга қаратилиши лозими”лиги, мазкур Қарорнинг 3-бандига мувофиқ ЖКнинг 8,54-моддалари мазмунига кўра, жазо одил бўлиши, ҳар бир ҳолатда индивидуал тайинланиши, жиноятнинг хусусияти ва ижтимоий хавфлилик даражасига, айбдорнинг шахсига, шунингдек, жазони енгиллаштирувчи ва оғирлаштирувчи ҳолатга мувофиқ бўлиши кераклиги тушунтирилган.

Юқоридагиларга асосан судлов ҳайъати, биринчи инстанция суди томонидан судланувчилар Ш.А. ва О.Б.ларга жазо тайинлашда, жиноятнинг ҳолатини ва ижтимоий хавфлилик даражасини, яъни ўта оғир жиноятлар туркумига киришини, қилмишнинг сабаблари ва оқибатларини, уларнинг шахсларини, жазони енгиллаштирувчи ва оғирлаштирувчи ҳолатларини эътиборга олиб, ЖКнинг 57-моддасини қўллаган ҳолда модда санкциясининг минимал миқдоридан ҳам кам миқдорида озодликдан маҳрум қилиш жазосини тайинлаш тўғрисида тўғри қарор қабул қилинган.

Ўзбекистон Республикаси Жиноят-процессуал кодекси 497 ^{13, 17, 26, 31, 34, 36}-моддаларига амал қилиб, судлов ҳайъати Жиноят ишлари бўйича Нукус шаҳар судининг Ш.А., О.Б., Н.Б. ва А.Ж.ларга нисбатан чиқарилган 2021 йил 21 сентябрдаги ҳукмининг Ш.А., ва О.Б.ларга оид қисми ўзгаришсиз қолдирилди

Т.ТУРДИМУРАТОВ,

Қорақалпоғистон Республикаси жиноят ишлари бўйича

судлов ҳайъати судьяси.

Қорақалпоғистон ахборот агентлиги.