Тошкент автовокзалида халқаро рейслар йўлга қўйилди

Бугунги кунда мамлакатимиз аҳолисига кўрсатилаётган автотранспорт хизматлари сифатини яхшилаш, юртимизнинг чекка қишлоқ ва туманларини вилоят марказлари билан боғлашда жамоат тарнспорти қатновини йўлга қўйиш борасида Ўзбекистон Транспорт вазирлиги томонидан катта ишлар амалга оширилмоқда. Давлатимиз раҳбарининг 2017 йил10 январ куни қабул қилинган Аҳолига транспорт хизмати кўрсатиш ҳамда шаҳарлар ва қишлоқларда автобусларда йўловчилар ташиш тизимини янада такомиллаштириш чора-тадбирлари тўғрисида ПҚ- 2724 -сон қарори, 2018 йил 6 март куни қабул қилинган Автомобиль транспортини бошқариш тизимини янада такомиллаштириш чора-тадбирлар тўғрисида ги ПҚ- 3589 сон қарорларида белгиланган вазифалар ишжроси босқичма- босқич амалга оширилмоқда.Жумладан, бундан 40 йил аввал бунёд этилган пойтахтимиздаги Тошкент автовокзалини замонавий қиёфага келтириш, бу ердаги шарт- шароитларни сўнгги талаб даражасига кўрсатиш, йўловчилар ва мамлакатимизга ташриф буюраётган сайёҳлар учун қулай шароитларни яратиш, маҳаллий ва халқаро йўналишларда амалга оширилаётган қатновларни тизимли йўлга қўйиш мақсадида кенг кўламли реконструкция ишлари амалга оширилди.

Фойдаланишга топширилаётган Тошкент автовокзалида бир вақтнинг ўзида 2200 нафар йўловчига хизмат кўрсатиш имкони яратилган. Вокзал сўнгги русумдаги технологиялар билан жиҳозланган. Бу ерда замонавий VIP-зал, она ва бола хонаси, тиббиёт хоналари, аёллар ва эркаклар учун алоҳида номозхона, меҳмонхона ва хостел ташкил этилган. Бундан ташқари имконияти чекланган фуқароларнинг автовокзал ҳудудида эмин- эркин ҳаракат қилиши учун барча шароитлар яратилган. Иккита лифт, иккита эскалатор, махсус пандуслар шулар жумласидан. 31 та автобусларга чиқиш перронлари ва 80 та автобус учун жой мавжуд.

Хозирги кунда Тошкент автовокзалидан - 12 та халқаро йўналиш Қозоғистон Республикасининг Чимкент шаҳрига кунига - 4 та, Туркистон шаҳрига кунига - 1 та, Қизил Орда шаҳрига кунига 1 та, Олма-ота шаҳрига кунига 3 та, Ушкунур, Тараз, Жеттисой ва пойтахт Остона шаҳарларига кунига 1 та тўғридан-тўғри рейслар, Қирғизистон Республикасининг пойтахти Бишкек шаҳрига кунига - 2 та, Тожикистон Республикасининг Хўжанд шаҳрига кунига 1 та ҳамда Россия Федерациясининг Нижний Новгород шаҳрига ҳафтасига - 3 та ва Татаристон пойтахти Казань шаҳарларига ҳафтасига 2 та тўғридан тўғри рейслар очилган ва кунига 15 дан ортиқ рейслар бажарилиб, автобуслар хизматидан кунига 500-1000 тагача йўловчилар фойдаланибкелинмоқда. Қолаверса, нафақат пойтахт Тошкент балки Республикамизнинг бошқа ҳудудларидан ҳам халқаро қатновларнинг йўлга қўйилгани аҳолимизга янада қулайлик яратмоқда. Жумладан, Чирчиқ- Ушкунур, Нукус- Ушкунур, Самарқанд- Панджикент, Самарқанд- Олмаота, Самарқанд- Туркистон, Термиз- Душанбе, Денов- Душанбе йўналишларида бугунги кунда мунтазам қатновлар амалга оширилмоқда. Жами халқаро йўналишлар сони 19 та.

Бундан ташқари Тошкент-Самарканд, Тошкент-Зарафшон, Тошкент-Каттакўрғон, Тошкент-Хатирчи, Тошкент-Мирбозор, Тошкент-Пахтаобод, Тошкент-Учкудук, Тошкент-Гагарин, Тошкент-Зомин, Тошкент-Янгиер, Тошкент-Термиз, Тошкент-Денов, Тошкент-Бухоро, Тошкент-Қоракўлйўналишлари бўйича кунига - 10 дан ортиқ маҳаллий рейслар бажарилиб, автобуслар хизматидан кунига 400-500 тагача йўловчилар фойдаланмоқда. Узоқ масофали йўналишларга чипталар - 10 кун илгари сотилиши йўлга қўйилган. Имтиёзли йўловчиларга таълуқлихужжатлари орқали барча йўналишларда йўловчилар ташиш қоидаларига биноан ўз ҳуқуқларидан фойдаланади. Ҳозирда автовокзалда йўловчиларга юқори маданий савияда хизмат кўрсатиш йўлга қўйилган бўлиб, ҳар бир автобус йўналишга чиқишидан аввал тўлиқ техник кўрикдан, ҳайдовчилар тиббий кўрикдан ўтказилади. Автобусларнинг санитар ҳолати ҳам доим назорат остида.Шунингдек,автовокзалдан қатнайдиган автобуслардан фойдаланган йўловчилар юз бериши мумкин бўлган бахтсиз ҳодисалардан мажбурий суғурталанади, суғурта пули чипталар қийматига киритилган ва ўзаро ташувчилар билан тузилган шартномалар асосида тақсимланади.

Ўзбекистон Республикаси Президентининг 2018 йил 5 мартдаги 3584- сонли Ўзбекистон Республикаси фуқароларининг вақтинчалик меҳнат фаолиятини амалга ошириш учун республика ташқарисига транспортда чиқиш вақтида хавфсизлигини таъминлаш чора-тадбирлари тўғрисида қарори ижроси юзасидан Ўзбекистон Республикаси транспорт вазирлиги томонидан хорижий давлатларга вақтинчалик ишлаш учун чиқиб кетаётган фуқароларининг ўз вақтида манзилларига хавфсиз етказиб қўйишни ташкил этиш мақсадида Uzautotrans Service МЧЖ автобусда ташувларни амалга оширишга ихтисослаштирилган миллий корхонаси ташкил этилган эди. Мазкур корхона паркини замонавий автобуслар билан таъминлаш борасида Хитой Халқ Республикасининг Zhengzhou Yutong Bus Co. Ltd. компанияси билан2018 йилда имзоланган шартномага кўра 168 дона кўп ўриндиқли замонавий автобусларни сотиб олиш бўйича келишувга эришилган эди.

Бугун мазкур замонавий автобусларнинг барчаси Республикамизга олиб келинди. Ушбу автобусларда ҳайдовчи ва йўловчилар учун барча қулайликлар яратилган. Кондиционер, салондаги иқлим назорати, актив ва пассив хавфсизлик тизимлари шулар жумласидан. Автобус 53 нафар йўловчини ўз бағрига сиғдира олади. Ўриндиқлар юмшоқ бўлиб, ҳар бир йўловчига максимал даражада қулайлик яратилган. Агар зарурат бўлса, ўриндиқларни олд ва орқа томонга силжитиш ҳамда ён томонга ҳам созлаш мумкин. Ҳар бир йўловчи ўриндиғи устида ҳаво дефлектори ва индивидуал ёритиш лампалари мавжуд. Шунингдек, йўловчиларнинг қўл юкларни жойлаштириш учун салонинг юқори қисмида махсус жойлар ажратилган. Узоқ сафар давомида йўловчиларнинг зерикмаслигини таъминлаш мақсадида автобус салони юқори классдаги медиа тизм ва иккита монитор билан жиҳозланган.

Бундан ташқари руль бошқарувида бўлган ҳайдовчига ҳам алоҳида қулайликлар яратилган. Ҳайдовчининг иш жойи яхши жиҳозланган ўриндиғи эса оғирликка қараб автоматик тарзда созланади ва уч нуқтали хавфсизлик камарига эга. Бундан ташқари зарурат бўлганда ўриндиқнинг баландлиги ва оғиш бурчагини ўзгартириш мумкин.

Uzautotrans Service МЧЖ корхонаси ушбу янги автобусларда самарали фаолият кўрсатишни ташкил этиш мақсадида махсус танлов асосида 120 яқин ҳайдовчиларни саралаб олди.Уларнинг малакаси махсус ўқув дастури асосида оширилиб, хорижий давлатлар ҳудудида ҳаракатланаётганда эътибор қаратилиши лозим бўлган жиҳатлар ҳақида тўлиқ тушунчалар берилди.

Ўзбекистон Республикаси транспорт вазирлиги томонидан талаб юқори бўлган, йўловчиларининг катта оқими ҳаракатланаётган халқаро йўналишларда автобус қатновларини ташкил этиш борасида мунтазам ўрганиш ишлари олиб борилмоқда. Тўлиқ реконструкциядан чиққан Тошкент автовокзалининг фойдаланишга топширилиши ва Uzautotrans Service МЧЖ корхонаси автобусларининг йўналишларга қўйилиши республикамизда жамоат транспорти йўналишида янги ривожланиш даврини бошлаб беради десак муболаға бўлмайди.

Manba: darakchi. uz