Сув ичишдаги суннатлар қандай?

1. Сув пиёла каби идишга алоҳида қуйилиб, Бисмиллаҳ деб ичилади;

2. Сувни тик туриб ёки ётиб ичишлик одобсизликдир;

3. Сув ичишни бошламасдан аввал сув қуйилган идишни текшириб қўйишлик (чеккаси учмаганми, ичида нимадир қолмаганми дея);

4. Сувни ичаётганида оқизмасдан, томизмасдан ичилади;

5. Сув ичаётганда нафас олмасдан, сувни чайқаламасдан ичишга эътибор беришлик;

6. Сувни 3 мартада бўлиб-бўлиб ичишлик: биринчисида оз, иккинчисида ўртача ва учинчисида қаноат қилгудек даражада ичилади.

7. Сув ичиб бўлгач "Алҳамдулиллаҳ" демоқлик. Яна ҳам афзали: сувни биринчи марта бўлиб ичганида "Алҳамдулиллаҳ" демоқлик, иккинчи марта бўлганида "Алҳамдулиллаҳи Роббил ъаламин" демоқлик, учинчи мартасида эса "Алҳамдулиллаҳи Роббил ъаламин, ар-роҳманир роҳим" дейишликдир.

Суннатга кўра сув ичмоқлик...

Ҳузур қилиб сув ичар эканмиз, сув ичиш суннатларини билиб қўйишимиз муҳим. 

Савол: "Сув ичишдаги суннатлар қандай? Баъзилар тик туриб ичилган сувни тезда чиқариш керак, унда яхшилик йўқ,- дейишади. Бу тўғрими?"

Жавоб: Еган ва ичганларимизда эътибор қилишимиз керак бўлган энг муҳим жиҳат - унинг ҳалол бўлишидир. Мабодо, Аллоҳ асрасин, аммо халқумдан биргина ҳаром луқма ўтгани аниқ бўлса уни тупуриб, қусиб бўлса ҳам чиқариб ташламоқ лозим. Ҳаром луқмада яхшилик йўқ. Бу аниқ!
Аммо тик туриб сув ичишлик бу даражада эмас. Акс ҳолда тушунарсизлик ва адолатсизлик пайдо бўлади.
Еган ичганларимизни ҳалол бўлиш шартидан кейин суннатга кўра истеъмол қилсак, суннатни адо қилганлик савобини оламиз. Фақат суннатни фарз каби қаттиқ тарғиб эта олмаймиз, Фарз каби тушунтирмаймиз. Суннатга чақирилади, унга мажбур қилинмайди, суннатга риоя қилишлик одамнинг ўзига ҳавола этилади. 

Сув ичишда битта фарз бор: Сувнинг ҳалол йўл билан топилган бўлиши. 

Шундайки, Аллоҳ: "Сизга берилган неъматлардан албатта сўраласизлар"(1)- деб огоҳлантирган.

Сув ичишнинг суннатлари:

1. Сувни шошмасдан, оҳиста ичишлик. 
Ҳазрати Али розияллоҳу анҳу айтдилар: "Пайғамбаримиз соллаллоҳу алайҳи васаллам:"Сувни эмаётгандек ичинг, оғзингизга қуйиб ичманг"(3)  - деганлар. 

2. Сувни бир мартада эмас, икки, уч мартада ичмоқ ва ичаётганда ичига нафас бермаслик лозим.
Абу Қатода розияллоҳу анҳу дедилар: Набий соллаллоҳу алайҳи ва саллам буюрдилар: "Сизлардан бирингиз сув ичаётганида сув ичаётган идишига пуфламасин".(4)

Абу Саъад розияллоҳу анҳу айтдилар: Аллоҳнинг элчиси соллаллоҳу алайҳи васаллам дедилар: "Сув идишини оғзингдан узоқлаштирганингдан кейин нафас ол". (5)

3. Сувни ўтириб, ўтириб ичишга шароит бўлмаса тик туриб ичмоқлик. 
Абу Саид ал-Ҳудрий розияллоҳу анҳу Расулуллоҳнинг оёқда тик туриб сув ичишдан қайтарганликларини билдирганлар. (6)
Фақат ҳазрати Али розияллоҳу анҳудан келган бир ривоятда шундай: Ҳазрати Али розияллоҳу анҳу Куфа масжиди эшигида оёқда тик туриб сув ичди ва бундай деди: "Баъзилар бир кишининг оёқда тик туриб сув ичишини ёмон кўрадилар. Ҳолбуки мен Пайғамбаримиз соллаллоҳу алайҳи васалламнинг мен ичганимни кўрганингиздек ҳолда сув ичганини кўрдим".(7)

4. Сувни ўнг қўл билан ичмоқ.

Ибн Умар розияллоҳу анҳу айтдилар: Аллоҳнинг Элчиси дедиларки: "Бирингиз овқат еяётганида ўнг қўл билан есин, ичганида ҳам ўнг қўли билан ичсин.  Чунки шайтон чап қўлда ейди, ичади".(8)

5. Сув ичишни бошларкан "Бисмиллаҳир роҳманир роҳим" дейишлик. Ичиб бўлгач Аллоҳга ҳамд айтишлик, яъни "Алҳамдулиллаҳ" демоқлик.

Абу Ҳурайра розияллоҳу анҳу узун бир ҳадис охирида шундай дебдилар: "Расулуллоҳ соллаллоҳу алайҳи васаллам сут косасини олди, Бисмиллаҳ деди, ичди ва Аллоҳга ҳамд айтди".(9)

Умар ибни Салама розияллоҳу анҳу дедилар:
"Мен Расулуллоҳнинг тарбияларида эдим. Таом ейилаётганида қўлим товоқнинг ҳар жойида айланар эди. Аллоҳнинг расули менга "Болам, Аллоҳнинг исмини айт, ўнг қўлинг билан ва таомнинг ўзингга яқин бўлган тарафидан егин!"- деб буюрди.(10)

6. Сувни аҳлига икром этмоқ: 

Ирбад бин Сарийя розияллоҳу анҳу айтадилар: Расулуллоҳ соллаллоҳу алайҳи васаллам дедилар: "Эркак аёлига сув тутиб ҳам савоб олади".(11)