Сурия Тартус порти бўйича келишув бекор қилингани ҳақида Россияни хабардор қилмади

Суриянинг янги ҳукумати Тартус денгиз портини бошқариш бўйича инвестиция шартномасини бир томонлама бекор қилди ва Россия томонини қабул қилинган қарор ҳақида хабардор қилмади.

Бу ҳақда Сурия ҳукуматидаги манбаларга таяниб, "ТАСС" ахборот агентлиги хабар берди.

"Сурия маъмурияти Тартус портининг давлат назоратига ўтиши ҳақида Россия компаниясини хабардор қилмаган. Битимни бекор қилиш қарори бир томонлама қабул қилинган. Башар ал-Ассад режими ағдарилганидан сўнг келишув томонлари бир-бирлари билан ўзаро алоқада бўлмасликлари керак", - деди агентликнинг жараён билан таниш суҳбатдошларидан бири.

Аввалроқ Тартус губернаторлиги божхона директори Риад Жуди Суриянинг Al Watan газетасига янги ҳокимият 2019 йилда Россия компанияси билан тузилган Тартус портини бошқариш бўйича инвестиция шартномасини бекор қилганини маълум қилганди. Унинг сўзларига кўра, порт фаолиятидан олинган барча даромадлар “Сурия давлати манфаатларига йўналтирилади”.

Сурия ҳукумати 2019 йилда Россиянинг СТГ Инжиниринг компанияси билан инвестиция шартномасини имзолаган эди. Шартнома 49 йилга мўлжалланган. Суриянинг собиқ транспорт вазири Али Ҳамуднинг сўзларига кўра, ҳужжатда Россия томони портни бошқариши ва уни модернизация қилишга 500 миллион доллардан ортиқ сармоя киритиши кўзда тутилган.

Манбага кўра, Россия томони портни 2023 йил июнь ойида маҳаллий компаниянинг оператив бошқарувига топширган, бироқ назорат функцияларини бажаришда давом этган. "Россия компанияси шартнома тугатилгунга қадар унинг иштирокчиси бўлиб қолди", — дея қўшимча қилди у.

Агентликнинг яна бир манбаси таъкидлаганидек, шартнома шартларига кўра, ҳужжат имзоланган пайтдан бошлаб тўрт йил ичида Россия компанияси портни ривожлантиришга 500 миллион доллардан 50 миллион доллар сарфлаши керак эди порт аслида модернизация қилинмаган. Манбага кўра, Сурия маъмурияти портнинг келажакда хусусийлаштирилишини кутмоқда.