Шаҳзода Уильям: “Бизнинг оила ирқчи эмас!”

Бир неча кун олдин Британиянинг қироллик оиласидан бўлган ва кейинчалик ундаги ваколатлардан воз кечган шаҳзода Гарри ва унинг рафиқаси Меган Марклнинг Опра Уинфри билан бўлиб ўтган суҳбати кўплаб мунозараларга сабаб бўлган эди. Меган қироллик оиласидан норози эканини, улар фарзандига қироллик мақомини беришдан бош тортишганини айтган эди.

Энди эса бўлиб ўтган воқеаларга изоҳ бериш навбати шаҳзода Уильямга келди. У Виндзор уйида содир бўлаётган воқеалар ҳақидаги саволларига жавоб бериш вақти келганини айтди.

Кембридж шаҳзодаси ва унинг рафиқаси пайшанба куни Лондоннинг Шарқий қисмидаги мактаблардан бирига ташриф буюрдилар. Журналистлардан бир эса Уильямдан қироллик оиласига нисбатан ирқчилик бўйича айбловга изоҳ беришини сўради.

"Йўқ, бизнинг оиламиз ирқчи эмас", дея қатъий жавоб берди шаҳзода. Шу билан бирга у укасининг изоҳидан, ўзини тутишидан жаҳли чиққанини ҳам қўшимча қилди.

Букингем саройи бир неча кун олдин қиролича Елизавета II номидан ҳам баёнот берган эди. Ҳужжатда таъкидланишича, интервьюларда кўтарилган муаммолар, айниқса, ирқий масала ҳақидаги гаплар, қироличада катта ташвиш уйғотган ва у буни, албатта, жиддий кўриб чиқишини айтган.

Гаррининг отаси ва Британия тахтига меросхўр Шаҳзода Чарльз эса ушбу масала юзасидан берилган саволларга жавоб беришдан бош тортган.